Ардагер шахматшылар шайқасты
Қарт адамдарды әлеуметтік қолдау айлығының соңғы күндерінде Қарағандыда ардагер шахматшылырдың облыстық турнирі өткізілді. Оған 14 адам қатысты. Көпшілігі жас кездерінде облыстың, қаласы мен ауданының намысын қорғаған білікті ойыншылар.
Мәселен, 84 жастағы жезқазғандық спорт шеберіне кандидат Әзірбек Молдағалиев республиканың ардагерлер арасындағы бірнеше дүркін чемпионы және вице-чемпионы болып үлгерген. Белгілі қарағандылық шахматшылар Төлеу Ақашев, Төлеген Оразбеков, Аман Жанғожин, Сергей Игнатьевтер талай дүбірлі додада топ жарған. Олардың да спорт шеберіне кандидат атағы бар. Ойыншылар екі топқа бөлініп, алғашқы екі орын алғандар плей-офф кезеңіне шығатын болды. Топтық сайыс әр ойыншыға берілетін 15 минуттық рапид турнирі режимінде жалғасты.
Екі топта да ойындар шиеленіскен жағдайда өтті. Атап айтқанда, алғашқы топта Ә.Молдағалиев 1-турдың өзінде шахтинскілік Николай Примаковке есе жіберді. Пандемия кезіндегі үзіліс әсер еткен болу керек, үшінші турда фаворит Білімхан Хауиядан да ұтылып қалды. Нәтижесінде соңғысы осы топта бірінші орын алды да С.Игнатьев пен Н.Примаков бірдей ұпай жинады. Қосымша көрсеткіші тәуір болғандықтан алғашқысы жарысты жалғастыратын болды. Екіінші топта А.Жанғожин алдына жан салмады, мұнда екінші орынға Есентай Сәрсекеев қол жеткізді.
Сөйтіп, жартылый финалдың бірінші жұбында ежелгі дос әрі қарсыластар А.Жанғожин мен С. Игнатьев кездесті. Дебюттен ойын ортасына ауысқан сәтте қателік жіберіп алып, Сергей қарсыласының қолын қысты. Екінші жұпта спорт шебері Бауыржан Қасымовтың шахмат академиясының оқытушы-жаттықтырушысы болып қызмет ететін Б.Хауия қарсыласын бет қаратпады.
Ақтық сайыста ойын тең аяқталып, төрешілер ендігі жерде екі партиядан блиц (3 минут уақыт әрқайсына және әр жүріске 2 секунд қосылады) ойнауды ұсынды. Мұнда қарсыластар алма-кезек жеңіске жеткендіктен төрешілер А.Жанғожин мен Б.Хауия 1-2 орындарды бөлісті деген шешім шығарды. Үшінші орын С. Игнатьевтің қанжығасына байланды..
Жарысқа қатысушылар мен жүлдегерлерді облыстық ардагерлер кеңесінің төрағасы Оралды Төреғожин құттықтап, дипломдар, алғыс хаттар мен ақшалай сыйлықтар табыс етті.
Аман ЖАНҒОЖИН,
Қарағанды.