Қарағандылық оқушылардың үлкен жетістігі
Қарағандылық оқушылар Түркияда өткен ерекше халықаралық жарыста ел мерейін үстем етті. Даун синдромы бар балалар арасында Стамбулда ұйымдастырылған чемпионатта олар табандылық пен үздік дайындықтың арқасында жеңіске жетіп, үлкен жетістікке қол жеткізді. Бұл – тек спорттық жетістік емес, нағыз ерік-жігер мен еңбектің айқын көрінісі.
Чемпионатқа Қырғызстан, Түркия, Өзбекстан және Қазақстан спортшылары қатысты. Олар жүзу, жеңіл атлетика және үстел теннисі бойынша өз шеберліктерін ортаға салды.
– Біз «Батыл жүрек» қорымен ынтымақтастығымызды екі жыл бұрын бастадық. Осы уақыт ішінде көптеген маңызды жетістіктерге қол жеткіздік. Оқушыларымыз спортшылар арасындағы сындарлы жарыстарда үздік нәтижелерін көрсетті, – деді жаттықтырушы Владислав Фризен.
Даун синдромымен дүниеге келген Захар Непогодин ауыр қатерлі ісікті жеңіп шыққаннан кейін спортқа деген құштарлығын арттырды. Ол алғаш рет Астанада өткен республикалық чемпионатта үшінші орынға ие болып, одан бері жарыстарда үздік нәтиже көрсетіп келеді. Соңғы Стамбулдағы додада еркін жүзу, брасс, шалқалай және баттерфляй әдістерінен үш алтын медаль жеңіп алды.
– Захар – менің тұңғышым. Ол суды өте жақсы көреді және әрбір жаттығуға баруға қуанады. Иә, жолымызда қиындықтар болды, бірақ біз ешқашан мойымаймыз. Дертпен үздіксіз күресудеміз. Ең бастысы – балаға мейірімділікпен қарап, оның қызығушылықтарын ескеру. Қазір бұл біз үшін үлкен бақыт, ұлыммен мақтанамын. Қатерлі ісікпен күресіп жүрген барлық ата-анаға айтарым: ешқашан үмітіңізді үзбеңіздер, жағдай бір сәтте өзгеруі мүмкін. Ал спорт – кез келген кедергіні еңсеруге көмектеседі, – дейді Захар Непогодиннің анасы Галина Непогодина.
– Захар өзінің талпынысы арқасында мүмкіндіктерін кеңейтті. Бұл жеңіс – оның табанды еңбегінің айқын нәтижесі. Кейде жаттығу кезінде сәл еркелеп қалатыны бар. Әрбір жаттығу – оның болашақтағы жеңісіне бір қадам жақындау. Біз бірге үлкен биіктерді бағындыратынымызға сенеміз, – деп атап өтті жаттықтырушы Елена Райнгардт.
Жеңісі – жүйелі дайындықтың және кәсіби мамандар мен отбасының қолдауының нәтижесі. Жаттықтырушының айтуынша, бұл табыс оның тұрақты еңбегі мен жан-жақты қолдаудың арқасында келді.
– Нұрсана – нәзік әрі табанды қыз. Ол барлық жаттығуды белсенді түрде орындап, бар күш-жігерін салады. Жаттығуға әрдайым көтеріңкі көңіл-күймен келеді. Мен оның болашағынан үлкен үміт күтетініме сенімдімін. Алдағы уақытта ол тағы да жарыстарға қатысуды жоспарлап отыр, – дейді жаттықтырушы Яков Струнин.
Ерекше білім беру қажеттілігі бар балаларға арналған мектеп-интернатта оқитын Мұхаммед жеңіл атлетика, жүзу және үстел теннисінен 2-сыныптан бері шұғылданып келеді. Оның спортқа деген таланты дене шынықтыру сабақтарынан байқалып, бапкері арнайы бағдарламамен дамытты. Ел намысын қорғап жүрген мұндай балалар – табандылық пен батылдықтың айқын үлгісі.
Қанағат ЖИЕНҚҰЛОВА,
«QH»