Қарағандыда жүзден аса үй жылу маусымына дайын емес
Қарағанды қаласында алдағы жылыту маусымына дайындық жұмыстары әлі толық аяқталған жоқ. Жүзден астам тұрғын үй әзірлік тізімінде тұр, кейбірінде жөндеу жұмыстары енді ғана басталған. Аяқталу мерзімі – 20 қыркүйек. Аймақ басшысы Ермағанбет Бөлекпаев жылу энергиясы нысандарын аралап, жүргізіліп жатқан жұмыстардың қарқынын тексерді.
Қарағандыда 115 көпқабатты үй алдағы жылыту маусымына дайын емес. Бірқатар баспанаға күрделі жөндеу жұмыстары қажет. Жергілікті билік жағдайды бақылауда ұстап, тұрғындар мен коммуналдық қызметтерді қысқа әзірлікті жеделдетуге шақырып отыр. Қауіп – қақаған аяз емес, оған дайын болмау.
– Қазір күрделі жағдайда тұрған көпқабатты үйлермен нақты жұмыс жүргізілуде. Жалпы, 115 үй бақылауда тұр. Олардың бір бөлігінде күрделі жөндеу қажет, ал кейбір үйге ағымдағы жөндеу жұмыстарын жүргізу жеткілікті. Бірқатар үйде тұрғындар арнайы жөндеу қорына қаражат жинауды енді ғана бастап жатыр. Бұл – уақытты талап ететін процесс. Дегенмен жұмыстардың кешіктірілмеуі үшін жауапты органдармен және тұрғындармен тығыз байланыста жұмыс істеп жатырмыз. Біздің негізгі мақсатымыз – барлық жөндеу жұмысын 20 қыркүйекке дейін толық аяқтау. Бұл мерзім – жылыту маусымына қауіпсіз әрі уақытылы кіру үшін маңызды. Қазірден бастап барлық күш соған бағытталуда, – деді қала әкімі Мейрам Кожухов.
Қарағандыда көпқабатты үйлердің бір бөлігі газға қосылып, 2 мыңнан астам нысан дайындық актілерін алды – бұл тұрғын үй қорының 75 пайызы. Алайда 152 үй ерекше бақылауда тұр: құжат жүзінде дайын болғанымен, жыл сайын дәл осы мекенжайларда жылыту маусымында ақаулар қайталанады. Облыс әкімі жылу көздерін аралап, №1 және №3 жылу электр орталықтарындағы жөндеу жұмыстарын тексерді. Қазан айына дейін 26 бірлік жабдықты жөндеу жоспарланған. Қоймаларда қазірдің өзінде 400 мың тонна көмір бар – бұл кәсіпорындардың бір айлық үздіксіз жұмысын қамтамасыз етуге жеткілікті.
– №1 жылу электр орталығында жабдықтарды іске қосу жұмыстары 25-28 қыркүйек аралығында басталады. Біз жылу беру маусымы басталардан шамамен 3-4 күн бұрын дайындықтың соңғы кезеңіне көшеміз. Барлық жоспарланған жөндеу жұмыстары белгіленген мерзімге дейін толық аяқталады деп күтілуде. Отын қоры жағынан мәселе жоқ. Люблин штабының мәліметіне сәйкес, станцияда қажетті көмір қоры толық қамтамасыз етілген. Бұл қысқы маусымда жылу көздерінің үздіксіз жұмыс істеуіне толық жеткілікті, –дейді «Қарағанды Энергоцентр» ЖШС бас директоры Флюр Гарипов.
Қарағандыдағы ең ескі қосалқы станцияда жаңғырту жұмыстары аяқталуға жақын. Маңызды инфрақұрылымдық нысан Қарағанды, Теміртау және Саран қалаларын электр қуатымен қамтамасыз етіп отыр. Жөндеу аяқталған соң станцияның қуаты артып, жаңа тұрғын үйлер мен өндірістік нысандарды электр желісіне қосуға мүмкіндік туады. Сонымен қатар, апатты жағдай туындаған жағдайда қуатты қайта бөлу арқылы өңірдің энергетикалық тұрақтылығын қамтамасыз етуге қауқарлы болады.
– Аудан әкімдеріне нақты тапсырма. Көпқабатты тұрғын үйлердің жылыту маусымына дайындығына ерекше назар аудару қажет. Қажет болған жағдайда бұл жұмысқа «Сәулет және қала құрылысы бөлімі» мен өзге де тиісті құрылымдар жұмылдырылатын болады, –деп атап өтті өңір басшысы Ермағанбет Бөлекпаев.
Қарағанды облысында жылыту маусымына дайындық үшін 53 миллиард теңгеден астам қаражат бөлінді. Билік өкілдері тұрғындардың жылы және қауіпсіз қыс өткізуі үшін барлық қажетті шара қабылданғанын, ақаусыз маусым қамтамасыз етілетінін сендіріп отыр.
Қанағат ЖИЕНҚҰЛОВА,
«QH»