Қарағандыда су айдындары жаңарып, жаңа демалыс орындары ашылады

Қарағандыда Үлкен Бұқпа өзенін ретке келтіру және Орталық саябақтағы көлдерді тазарту жобасы жалғасуда. Жоба толық іске асқанда, өңір тұрғындары мен қонақтары үшін табиғи сұлулығы сақталған жаңа демалыс аймақтары пайда болады.

Өткен жылы өзеннің негізгі арнасы мен сол жақ тармағы тазартылып, плиталық жабындар мен қарау люктері жаңартылды. Биыл бірінші көлге жергілікті тазарту нысандарын орнатып, оны екінші және үшінші көлдермен байланыстыру көзделіп отыр. Су айналымын қамтамасыз ету үшін сорғы жүйесі енгізіліп, көлдерге жақын ұңғымалар бұрғылануда.

Жуырда жүзбелі экскаватордың көмегімен бірінші көл балдырлардан тазартылды. Мұнда бензин және дизель моторлы қайықтарға тыйым салынып, тек катамарандар мен электрмоторлы қайықтарға рұқсат берілді.

– Үлкен көлдегі жұмыс аяқталды. Соңғы екі жылда су айдынына 90 мың шабақ жіберілді, қазір олар өсіп, экожүйені тазартып жатыр. Енді екінші және үшінші көлдерді тазартамыз. Келер жылы үшінші көлге субұрқақ орнатылады, ал екінші көл хайуанаттар бағының қамқорлығына беріледі, – деді қала әкімі Мейрам Кожухов.

Қалалықтарға арналған тағы бір демалыс орны «Көгілдір тоғандар» аумағында пайда болады.

– Мұндағы басты міндет – көгалдандыру. Саябақ заманауи сәулеттік нысандармен және арт-объектілермен безендіріледі, – деп атап өтті әкім.

Облыс әкімі Ермағанбет Бөлекпаев та бастаманы қолдап, табиғи тепе-теңдікті сақтаудың маңыздылығын айтты.

– Біз жаңа демалыс аймақтарын құруды жалғастырамыз. Саябақтарда артық коммерциялық нысандар болмауы тиіс, бастысы – тұрғындар үшін табиғи әрі таза орта қалыптастыру, – деді ол.

Қала жаңарып, жасыл желекке оранып, тұрғындар үшін табиғатпен үндес жаңа тыныс алу орындары ашылмақ.

Құралай ӘЛЖАППАР,

«QH»