Қарағандыда Шәкәрім оқуларының үздіктері анықталды

Қарағанды облысында өткен Шәкәрім оқуларының облыстық кезеңіне өңірдің түрлі аймағынан 23 оқушы қатысты. Нәтижесінде Нұра ауданы, Егінді ауылынан келген 5 сынып оқушысы республикалық кезеңде облыс намысын қорғайтын болды.

Шәкәрім оқулары – Қазақстан Республикасының Ұлттық академиялық кітапханасы 2023 жылы бекіткен дәстүрлі байқау. Жыл сайын ұйымдастырушылар Шәкәрім Құдайбердіұлының 20 шығармасын іріктеп, қатысушылардың мәнерлеп оқу қабілетін сынайды. 5-8 сынып оқушыларының бұл шығармаларды жатқа білуі – байқау талабының негізгі шарттарының бірі. Жеңімпаздар шығармаларды әсерлі әрі шебер оқуы арқылы анықталады.

Облыстық деңгейдегі сайыс 13 наурызда Абай атындағы балалар кітапханасында өтті. Биылғы бас жүлдені Нұра ауданы, Егінді ауылының 5 сынып оқушысы Жанель Сағидулла иеленді. Ол 27 наурызда Астанада өтетін республикалық кезеңде Қарағанды облысының атынан қатысады.

Байқау қорытындысы бойынша бірінші орын Ақтоғай ауданы, Ақтас ауылынан келген Айсезім Маратқа бұйырды. Екінші орынды Саран қаласының оқушысы Ақнұр Кувадикова, ал үшінші орынды Нұра ауданы, Ізенді ауылынан Дархан Өмірзақ иеленді.

– «Шәкәрім оқулары» жас ұрпаққа Шәкәрім Құдайбердіұлының мұрасын кеңінен таныстырып, оның шығармашылығын терең түсінуге мүмкіндік береді. Сонымен қатар, бұл байқау балалардың әдебиетке деген қызығушылығын арттырып, патриоттық сезімдерін оятады, – деді Абай атындағы облыстық балалар кітапханасының инновациялық-әдістемелік бөлімінің басшысы Орал Мусина.

Жарысқа қатысушылардың барлығына Qasym баспасының арнайы сертификаттары мен естелік сыйлықтары табыс етілді.

Құралай КӨБЕНОВА,

«QH»