Қарағандыда ең әуезді азаншы анықталды
Қарағанды қаласында азан дауысы әуелеген ерекше рухани шара өтті. Облыстық Әнет баба мешітінде Қазақстан мұсылмандары діни басқармасының 35 жылдығына арналған «Әдемі әуезді азаншы» атты VI республикалық байқау ұйымдастырылып, еліміздің түкпір-түкпірінен жиналған 20 үміткер өз өнерлерін ортаға салды. Дәстүрлі сайыстың мақсаты – ата-бабалар аманатына адал болу, рухани құндылықтарды насихаттау және қасиетті Құран ілімін дәріптеу.
Азан – мұсылман қауымын бірлік пен рухани тазалыққа үндейтін қасиетті үн. Діни тұрақтылықты дәріптеген игі шара барысында қатысушылар Құран аяттарын жатқа айтып, азанды әуезді әрі дұрыс үлгіде орындаудан бақтарын сынады. Шарада үміткерлердің дауыс тазалығы мен азан айту шеберлігі басты бағалау өлшемі болды.
– Қазақстан мұсылмандары діни басқармасы 2009 жылдан бері республикалық азаншылар жарысын дәстүрлі түрде өткізіп келеді. Бұл – жай ғана сайыс емес, азан айту мәдениетін кеңінен насихаттап, Құран оқу шеберлігін кәсіби деңгейге көтеруге бағытталған игі бастама. Азан – Ислам өркениетінің рухани әрі көркем көрінісі. Оны әуезді үнмен жеткізу – үлкен шеберлікті ғана емес, жүректің тазалығын, ықылас пен иманды талап етеді, – деді Қазақстан мұсылмандары діни басқармасының төрағасы, Бас мүфти Наурызбай қажы Тағанұлы.
Жарыс қатысушылары үшін бұл тек тәжірибе алмасу алаңы ғана емес, рухани байланыс орнатуға жол ашқан мағыналы шара болды. Сайыс барысында діни білім тереңдеп, қатысушылар ерекше рухани шабыт алғандарын айтады.
– Намазға, Құран оқуға және азан айтуға мектепті бітіргеннен кейін бет бұрдым. Қасымдағы жігіттердің намаз оқуы маған үлкен үлгі болды. Соларға қарап мен де қызығушылық таныта бастадым. Кейін Нұр-Мүбәрак университетіне оқуға түсіп, сол жерде азан шақыруды, Құранды дұрыс әрі көркем оқуды үйрендім. Барлық ұстазыма шын жүректен алғыс айтамын – олардың еңбегі мен бағыт-бағдары маған үлкен жол ашты, – дейді Астана қаласы «Әзірет сұлтан» мешітінің ұстазы Базархан Қайнаров.
Азаншылар арасындағы байқау өз мәресіне жетіп, үздіктер анықталды. Қазылар алқасының шешімі бойынша бас жүлдені астаналық Базарқан Қайнар жеңіп алды. Екінші орын Батыс Қазақстаннан келген Асхат Асылбеков, ал үшінші орын алматылық Баубек Берліғалиұлына бұйырды. Жеңімпаздарға арнайы ақшалай сыйақылар табысталып, еңбектері лайықты түрде бағаланды.
Жұпар АМАНБАЙҚЫЗЫ,
«QH»