Қарағандыда «Ақылды үй» зертханасы ашылады
Қарағанды техникалық-құрылыс колледжінде жаңа оқу жылында «Ақылды үй» зертханасы іске қосылады. Бұл туралы журналистерге арналған баспасөз турында колледж директоры Әсел Сапарова мәлімдеді. Жоба «Жұмысшы жылы» аясында қолға алынып, «Жылжымайтын мүлікті басқару» бағыты бойынша хаус-мастер мамандарын даярлауға мүмкіндік береді. Заманауи зертхана студенттердің тәжірибелік білімін арттыруға бағытталған.
Қазіргі таңда колледжде мыңнан астам студент құрылыс және дизайн бағыттары бойынша білім алуда. Заманауи талаптарға сай жабдықталған оқу кабинеттері мен шеберханалар студенттердің кәсіби дағдыларын шыңдауға мүмкіндік береді. Қатысушылар оқу ордасын аралау барысында білім беру процесінің қалай ұйымдастырылғанын, сондай-ақ болашақ мамандардың тәжірибелік машықтарын жетілдіру жолдарын көзбен көріп, танысты.
– Биыл Мемлекет басшысының бастамасымен «Жұмысшы мамандықтар жылы» деп жарияланғаны біз үшін үлкен серпіліс болды. Бұл бастама қоғамда жұмысшы мамандықтарының мәртебесін айтарлықтай көтеруге ықпал етті. Жыл бойы ауқымды шаралар ұйымдастырылып, осы бағыттағы жұмыстар жүйелі түрде жүргізілді. Соның нәтижесінде халықтың, ата-аналар мен жастардың жұмысшы мамандықтарына деген көзқарасы түбегейлі өзгеріп келеді деп сеніммен айта аламыз, – деді Қарағанды техникалық-құрылыс колледжінің директоры Әсел Сапарова.
Колледжде бүгінгі еңбек нарығында жоғары сұранысқа ие құрылыс, дизайн, дәнекерлеу, ағаш өңдеу, интерьер және өндірістік дизайн, архитектура сынды 15 түрлі мамандық бойынша сапалы білім берілуде. Бұл оқу орнының басты артықшылығы – теорияны тәжірибемен ұштастыра отырып, студенттерді нақты өндірістік ортада жұмыс істеуге бейімдеуі. Сонымен қатар, мұнда мүмкіндігі шектеулі жандарға арналған арнайы бейімделген бағдарламалар да қарастырылған, бұл – инклюзивті білім беру қағидаттарын ұстанудың жарқын көрінісі.
– Колледжде балалардың сапалы білім алуына барлық жағдай жасалған. Оқу орны заманауи құрал-жабдықтармен толықтай қамтамасыз етілген. Соның арқасында біз студенттерден жақсы нәтиже көріп отырмыз. Мәселен, виртуалды дәнекерлеу құрылғысын алсақ – бұл ең алдымен қауіпсіздік техникасын сақтай отырып оқушыларды оқытуға мүмкіндік береді. Мұндай технологиялар студенттерді түрлі өндірістік жағдайларға бейімдеп, қауіп-қатерден қорғауға бағытталған, – дейді өндірістік оқыту шебері Дархан Блялов.
– Мен жиһаз өңдеу мамандығы бойынша білім алып жатырмын. Бұл колледжді таңдаған себебім – оқу орны туралы көп жерден жақсы пікірлер естіп, өз көзіммен көріп, танысқан соң нақты шешім қабылдадым. Мұнда біз, мысалы, кереует немесе тумбочка секілді жиһаздардың сызбаларын жасап қана қоймай, оларды арнайы бағдарламалар арқылы жобалап, бағдарламалауды да үйренеміз. Теория мен тәжірибе қатар жүреді, бұл бізге болашақта маман ретінде қалыптасуға үлкен мүмкіндік береді, – деп атап өтті 2-курс студенті Марғұлан Жолболды.
Колледж ірі кәсіпорындармен тығыз серіктестікте жұмыс істейді. Бұл білім алушыларға оқу барысында өндірістік тәжірибеден өтуге, ал кейін тұрақты жұмысқа орналасуға мол мүмкіндік береді. Соның жарқын мысалы – колледждің түлегі Артур Бекметов. Ол оқу орнын сәтті аяқтап, бүгінде серіктес кәсіпорындардың бірінде өз мамандығы бойынша еңбек етуде.
– Қазіргі таңда мен құрылыс компаниясында, нақтырақ айтсақ, «Метрополь» тұрғын үй кешені учаскесінде жұмыс істеймін. Мамандығым – құрылыс шебері. Бұған дейін колледжде «Ғимараттар мен құрылыстарды салу» мамандығы бойынша білім алдым. Бұл сала өзіме өте ұнайды, өйткені таңдаған мамандығым бойынша білім алып, бүгінде оны тәжірибе жүзінде іске асырып жүрмін. Сонымен қатар, жұмыс барысында да үнемі жаңа дүниелер үйреніп, кәсіби тұрғыда дамып келемін, – дейді Қарағанды техникалық-құрылыс колледжінің түлегі Артур Бекметов.
Сабақ барысында студенттер тек теориямен шектеліп қоймай, заманауи құрал-жабдықтармен жұмыс істеуді үйренеді. Сонымен қатар, олар сызбалар жасау мен жобалау бағдарламаларын меңгеріп, өз кәсіби дағдыларын жетілдіре түседі. Бұл – болашақ мамандарды заманауи еңбек нарығына дайындаудың маңызды қадамы.
Қанағат ЖИЕНҚҰЛОВА,
«QH»