Қарағанды жүк тиеу-көлік басқармасының мерейтойы

Биыл Қарағанды көмір бассейніндегі ең көне кәсіпорындардың бірі – Қарағанды жүк тиеу-көлік басқармасы 90 жылдығын атап өтуде. Терең тарихы бар, еңбек даңқына бөленген бұл мекеме – өңір экономикасының негізін қалаған іргелі құрылымдардың бірі.

Мерейтой қарсаңында Пришахтинск қаласындағы «Жастар» мәдениет үйінде салтанатты жиын ұйымдастырылып, сала ардагерлері мен қазіргі қызметкерлері құрметке ие болды. Теміржолшылар күніне орай өткен шарада ұзақ жылдар бойы адал қызмет атқарған машинистер, слесарь-жөндеушілер, диспетчерлер мен вагоншылар марапатталды.

«Біз «Qarmet» АҚ жүк айналымы бойынша үздіктердің қатарындамыз. Жақында Түрікменстаннан мамандар келіп, біздің көрсеткіштеріміз олардың нәтижесінен екі есе жоғары екенін байқады», – деді «Qarmet» АҚ логистика жөніндегі директоры Вячеслав Миронов. Оның айтуынша, Қарағанды жүк тиеу-көлік басқармасының теміржол желісі 735 шақырымды құрап, 2 430 адам еңбек етеді, ал 95 маневрлік тепловоз қызмет көрсетеді.

Қарағанды көмір бассейнінің өндірістік тамырына айналған бұл мекеме бүгінде көмірден бөлек, халық тұтынатын тауарлар, құрылыс материалдары секілді жүктің қозғалысын қамтамасыз етеді. Кәсіпорын жүзден аса серіктеске тұрақты қызмет көрсетіп, өндіріс пен қауіпсіздік көрсеткіштерін арттыруда.

Қарағанды жүк тиеу-көлік басқармасының директоры Александр Мануйленко мерейтойда: «Біз тек көмір департаментіне ғана емес, облыстағы түрлі ұйымдарға қызмет көрсетеміз. Кәсіпорын 90 жылдық тарихында өндірістік және тасымалдау көрсеткіштері бойынша жақсы деңгейге жетті. Теміржолшылар – ел экономикасының тірегі», – деді.

Теміржол өткелінің кезекшісі Қайып Шәкенов 15 жыл бойы адал еңбек етіп келеді. Ол үшін бұл мерейтой – өміріндегі маңызды белес.

Марапаттау рәсімі концерттік бағдарламаға ұласып, өнерпаздар сахна төрінде өнер көрсетті. Осылайша, салтанатты жиын теміржолшыларға деген құрмет пен олардың еңбекқорлығын тағы бір мәрте айқындап, мерекенің мәнін арттырды.

Қанағат ЖИЕНҚҰЛОВА,

«QH»