Қарағанды әуежайы – Еуропа мен Қытайды жалғайтын жаңа транзиттік хаб
Қарағандыдағы «Сарыарқа» халықаралық әуежайында заманауи авиаотын құю кешенінің құрылысы басталды. Бұл жоба өңірдің транзиттік әлеуетін арттырып, Қытай мен Еуропаны байланыстыратын стратегиялық әуе қақпасына айналдыруға бағытталған.
Жоба іске қосылатын күні Қарағандыға алғаш рет Үрімшіден С909 әуе кемесі қытайлық ресми делегацияны жеткізді. Тараптар Jet A-1 авиаотынын жеткізу, әуе қатынасын дамыту және жүк тасымалын үйлестіру жөнінде маңызды келісімдерге қол қойды.
– Мемлекет басшысы әуежайды дамыту жөнінде нақты тапсырма берді. Біз оны континенттік мультимодальды аэрохабқа айналдыру бағытында жүйелі жұмыс жүргізіп жатырмыз. Қазірдің өзінде жылына 50 мың тонна жүк өңдеу мүмкіндігі бар, ал төрт жылдан соң бұл көрсеткіш 200 мың тоннаға жетеді. Каспий порттарының кеңеюімен бірге Қарағанды Қытай мен Еуропаны байланыстыратын негізгі логистикалық торапқа айналады, – деді Қарағанды облысының әкімі Ермағанбет Бөлекпаев іргетас қалау рәсімінде.
Жобаны Silkway Aviation Airport Development (Silu Hangkong) бірлескен кәсіпорны жүзеге асырады. Құрылтайшылары – қытайлық компаниялар және қазақстандық ASG (Тимур Турлов, Ерлан Оспанов, Руслан Ғаббасов). Құрылыс үш кезеңнен тұрады: алдымен технологиялық жабдықтар орнатылады, кейін сыйымдылығы 2 000 текше метрлік резервуар мен қызметтік ғимарат тұрғызылады, ал 2027 жылға қарай қойма көлемі 4 000 текше метрге дейін ұлғайтылады. Жоба PetroChina компаниясымен бірлесе, Еуропалық сапа және қауіпсіздік стандарттарына сай жүзеге аспақ.
– Қазақстан мен Қытай арасындағы энергетикалық және авиациялық серіктестіктің жаңа кезеңі басталды. Біз Қарағанды әуежайын жоғары сапалы Jet A-1 авиаотынымен қамтамасыз етуге дайынбыз. Бұл Қазақстанның авиациялық инфрақұрылымын дамытуға қосқан үлесіміз болады, – деді PetroChina International (Kazakhstan) Ltd бас директоры Гэн Цзянь.
Silkway Aviation Airport Development тек отын жеткізумен шектелмей, Қытайдан Еуропаға дейін мультимодальды жүк тасымалын ұйымдастыруды да көздеп отыр.
– Бұл жоба «One Belt, One Road» бастамасының маңызды буынына айналады. Ол транзиттік бағыттарды кеңейтіп, жүк тасымалының тиімділігін арттырады және Қазақстанның халықаралық көлік-логистикалық картасындағы рөлін күшейтеді, – деп түйіндеді JET FUEL SERVICE компаниясының негізін қалаушы Ерлан Оспанов.
Құралай ЖҰМАҒАЛИҚЫЗЫ,
«QH»