Қарағанды музыкалық комедия театрының жаңа маусымы

Қарағанды академиялық музыкалық комедия театры жаңа театр маусымын салтанатты түрде ашты. Көрермендер назарына венгр композиторы Имре Кальманның ең танымал шығармаларының бірі – «Баядера» опереттасы ұсынылды. Әсерлі музыка, жарқын образдар мен кәсіби актерлік ойын жаңа маусымның жарқын басталуына себеп болды.

53-ші маусым шымылдығын ерекше салтанатпен ашты – сахнада Имре Калманның ең танымал туындысы саналатын «Баядера» опереттасы шырқалып, оны тірі симфониялық оркестрдің әуені әрледі.

– Көрермендер сахнадан өздерінің сүйікті солистерін қайта көріп, дауыстарын естіді. Сонымен қатар, жақында ғана труппаның құрамына енген жас түлектер де алғаш рет үлкен сахнаға шықты. Бұл – олар үшін кәсіби жолдағы алғашқы қадам, толқуы мен шабытты қатар алып жүретін ерекше сәт. Спектакльді жас дирижер басқарды, ол музыкалық партияларға өзіндік көзқарасын қосып, таныс әуендерге жаңа тыныс берді, – деді Қарағанды академиялық музыкалық комедия театрының жетекшісі Амантай Ибраев.

Бұл қойылым – театр ұжымы үшін жай ғана жаңа маусымның премьерасы емес. Бұл – шығармашылық әлеуетті көрсететін, ұжымның бірлігін, кәсібилігін паш ететін сәт. Мамандардың айтуынша, классикалық опереттаға деген осындай шынайы сүйіспеншілік театрдың имиджін қалыптастырып, оны өнер кеңістігінде айшықтай түседі.

– Мен спектакльде үнді ханзадасы Раджамидің рөлін сомдадым. Оқиға желісі бойынша, ол сахна жұлдызы – актриса Одеттаға ғашық болады. Бірақ бәрі бірден оңай өрбімейді: Одеттаның өгей әпкесі бар және олар ханзадаға әзілдеп, Одетта оған күйеуге шығады деп бәс тігіп, оқиғаны шиеленістіре түседі. Дегенмен, бәрі жақсы аяқталады – бұл классикалық опереттаға тән дүние. Финалда махаббат жеңіп, көрермен де, кейіпкерлер де бақытқа бөленеді, – дейді Қарағанды академиялық музыкалық комедия театрының актері Денис Кудряшов.

– Мен Одеттаның рөлін сомдадым. Бұл – оңай рөл емес, қарапайым кейіпкерден әлдеқайда күрделі. Әсіресе вокалдық жағынан дайындық көп уақытты алды. Хор бөліктері ұзақ дайындалды, техникалық жағынан да, эмоционалдық жағынан да терең жұмыс жүргізілді. Қойылымның өзі маған өте ұнайды: оқиға қызықты, үнді мотивтерімен байытылған, барлығы ұлттық костюмдермен безендірілген. Әсем музыка, түрлі түсті сахналық көріністер – бұл өте әдемі, көрерменді баурап алатын оперетта, – деп атап өтті Қарағанды академиялық музыкалық комедия театрының актрисасы Маржан Буланова.

Қанағат ЖИЕНҚҰЛОВА,

«QH»