Қарағанды фотоклубының жаңа шығармашылық қадамы
Қарағанды қаласында фотоклуб тарихында алғаш рет ерекше оқиға болып өтті — шақырылған автордың жеке көрмесі ұйымдастырылды. Бұл Қарағанды фотоклубының жаңа шығармашылық бағытына жасаған алғашқы қадамы болып табылады. Бұған дейін клуб мүшелері өзара ғана көрмелер өткізетін болса, енді сырттан танымал авторларды шақыру арқылы көрерменнің таным көкжиегін кеңейтуді мақсат етуде.
Биылғы жылы фотоклубқа Алматыдан келген белгілі фотограф әрі спорт жаттықтырушысы Виктор Горбунов шақырылды. «Керемет сәттердің шоғырынан» деп аталған оның жеке көрмесі әртүрлі жанрдағы фотосуреттерді қамтиды: пейзаж, портрет, спорттық кадрлар мен күнделікті өмірдің сырлы сәттері. Виктор Горбунов осы соңғы он жыл ішінде түсірген ең үздік туындыларын көпшілік назарына ұсынды.
Қарағанды облыстық бейнелеу өнері музейі басшысының орынбасары Мейрамгүл Айдарханқызының айтуынша, көрме залында автордың шеберлігі мен көркемдік талғамын толықтай тамашалауға мүмкіндік бар.
Виктор Горбунов фотосурет өнеріне 1982 жылдан бері қызығушылық танытып келеді. Сол уақыттан бері ол халықаралық деңгейдегі көптеген көрмелерге қатысып, «Жыл фотосы», «Экофото», «Алтын объектив Алматы» және «Адамдар мен таулар» сияқты беделді байқауларда жеңіске жеткен.
Сонымен қатар, Виктор Горбунов – тек фотограф қана емес, Қазақстанда танымал жеңіл атлетика жаттықтырушысы. Сырықпен секіру спортынан дайындаған шәкірттері КСРО құрамасында өнер көрсеткен. 1979 жылы оған «Қазақ КСР-нің еңбек сіңірген жаттықтырушысы» атағы берілген.
Бұл көрме – тек фотосурет өнерінің ғана емес, сонымен бірге өмірге деген махаббат пен құштарлықтың көрінісі. Ұйымдастырушылар алдағы уақытта да осындай авторлық жобаларды Қарағанды қаласында жиі өткізіп, қаланың мәдени өмірін байытуды жоспарлап отыр.
Құралай ӘЛЖАППАР,
«QH»
Фото Светлана мен Тимур Кудериновтердікі