«Ана тілім – абыройым» байқауы
Қарағанды облысында Қазақтың ұлы ақыны Абай Құнанбаевтың 180 жылдық мерейтойы мен Мемлекеттік қызметшілер күніне орай «Ана тілім – абыройым» атты облыстық байқау ұйымдастырылды. Тілдерді дамыту жөніндегі басқарма өткізген шараға облыстың түкпір-түкпірінен жиналған 10 команда қатысты.
Іс-шараның басты мақсаты – мемлекеттік тілдің қолданылу аясын кеңейту, Абайдың мол мұрасын жастарға дәріптеу және ресми құжаттармен жұмыс істеу машығын жетілдіру.
Байқау төрт кезеңнен тұрды. Алғашқы кезеңде қатысушылар өз командаларын таныстырып, мемлекеттік тілге қосып жатқан үлестері туралы айтты. Екінші кезеңде Абайдың өмірі мен шығармашылығы бойынша сұрақтарға жауап беріп білімдерін сынады. Үшінші кезеңде қазақтың мақал-мәтелдерін талдап, ана тілінің байлығын паш етсе, соңғы кезеңде ресми құжаттарды мемлекеттік тілде сауатты рәсімдеуден сайысты.
Шара барысында қатысушыларға тіл жанашырлары мен мәдениет саласының өкілдері ақыл-кеңестерін беріп, байқаудың маңыздылығын атап өтті.
«Енді күнделікті мемлекеттік қызметкерлердің тілге деген құрметін арттыру мақсатында осындай іс-шараларды жиі өткізіп тұрамыз деп есептейміз», — деді Қарағанды облысы білім басқармасы басшысының орынбасары Алма Шалабаева.
«Бұл мемлекеттік қызметкерлер арасында тіліміздің құнарлығын сақтаған шараның бірі деп есептейміз», — деп атап өтті Қазақстан Жазушылар одағының төрағасы Жанат Жаңқашұлы.
Қатысушылар да өз әсерлерімен бөлісті. Шет ауданының мәдениет, тілдерді дамыту бөлімінің басшысы Асхат Ахметов: «Дәл осындай байқаулар тіліміздің қадірін білуге жол ашады», — дейді.
Сайыс қорытындысы бойынша бірінші орынды жеңіп алған команда 500 мың теңге көлемінде ақшалай сыйақыға ие болды.
«Ана тілім – абыройым» байқауы – мемлекеттік тілді насихаттаудың және Абай рухын ұлықтаудың жарқын үлгісі болып қала бермек.
Құралай КӨБЕНОВА,
«QH»