Қала тазалығы – ортақ міндет

Қарағанды қаласының әкімі: «Терезе түбіне қоқыс тастауды доғарыңдар!». Қарағанды қаласының әкімі Мейрам Кожухов әлеуметтік желідегі парақшасында көшелердің біріне КАМАЗ-бен қоқыс төккен тұрғынның кешірім сұрауын жариялады.

«Мен тастаған қоқыс үшін кешірім сұраймын. Маған хаттама толтырылып, айыппұл салынды. Мұндай жағдай қайталанбайды, аудан тұрғындарынан кешірім өтінемін», – деді тәртіп бұзушы.

Оқиға Парковая, Хабаровская және Ишимская көшелерінің қиылысында орын алған. Қала әкімі жағдайға байланысты өз ойын білдірді.

«Өз қалаңды осынша сүймеуге бола ма? Адам өз үйінің маңына, балалары ойнайтын аулаға КАМАЗ-бен қоқыс төгуге қалай дәті барады?!» – деді Мейрам Кожухов.

Тәртіп бұзушыға айыппұл салынып, хаттама толтырылды және қоқысты өз күшімен тазалау міндеттелді. Бірақ әкімнің айтуынша, мәселе жазада емес, санада. «Таза Қазақстан» – бір реттік акция емес, бұл – өмір салты мен нормаға айналуы тиіс», – деді қала басшысы.

Мейрам Кожухов енді мұндай әрекеттерді жасағандардың бейнесін жасырмай, жариялайтынын ескертті.

Құралай КӨБЕНОВА,

«QH»