Адал еңбек иесі
Қарағанды аулаларында таңғы уақытта ит қыдыртушылар мен аула сыпырушылардан басқа ешкімді кездестіре бермейсіз. Ерте тұрып, еңбекке кірісетін жандардың бірі – Мансұр Баянов. Бүкіл аудан ұйқыда жатқанда, ол сыпырғысын қолына алып, аула тазалығына кіріседі. Жұмысқа жақында кіріскеніне қарамастан, жауапкершілігі мен тиянақтылығы үшін тұрғындар оны қазірдің өзінде жақсы көріп үлгерген.
– Жасым жеткен соң өткен жылы зейнетке шықтым. Бірақ үйде қарап отыра алмаймын. Қыста аула сыпырушы келмей қалған кезде қиын болды. Кейін ойландым да, үйде бос жатқанша, жұмыс істеген дұрыс деп шештім, – дейді ол.
Мансұр Баянов – 40 жылдық еңбек өтілі бар кенші. Еңбек жолын «Сокурская» шахтасында жер асты электрслесарі болып бастаған. Кейін «Саранская» мен «Сокурская» шахталары біріктірілгенде тазалау бөлімінің кеншісі болып еңбек етті. Елді көмірмен қамтамасыз еткен сол жылдар оның денсаулығына әжептеуір әсер етіпті.
– Кейін мені жер бетіне шығарды. 2016 жылы техникалық кешенге жұмысқа орналастым, зейнетке шыққанға дейін сонда істедім. Ол жақта да мені жібергілері келмеді, – дейді Мансұр Баянов.
Мансұр анасын ерекше ілтипатпен еске алады. Анасы 1978 жылы оны және інісін Башқұртстанның Салават қаласынан Қарағандыға алып келген. Балаларды жалғыз өсіру оңай болмаған, сондықтан анасы да шахтаға жұмысқа тұрған. Еңбекқорлықты Мансұр дәл сол кісіден үйренгенін айтады.
Қазір аула сыпырушы болып көп ақша таппаса да, тұрғындардың алғысы оған шабыт береді.
– Адамдар рақметін айтып, «қандай жақсы тазалап жатырсыз, көңіліміз көтеріліп қалды» деп жатады. Әсіресе машиналардың жанын тазалағанда қуанып, «күніңіз сәтті өтсін» деген ізгі тілектерін білдіреді, – дейді.
Дегенмен, кей сәттерде көңілі түсетінін жасырмайды. Тазалап кеткен жерін қайта қоқысқа толтырып кететіндер бар.
– Қоқысты көбіне жасыл шөптің үстіне лақтырып кетеді. Қап-қап қоқыс жатады. Қоқыс жәшігіне жеткізуге ерінеді. Осындай салақ адамдар да бар бізде, – деп өкінішін де айтты.
Адал еңбек ететін Мансұр Баянов бос уақытын да тиімді өткізеді. Ол немерелерімен уақыт өткізуді, татар-башқұрт этномәдени бірлестігінің концерттерінде көңілді билер билеуді ұнатады.
Ералы ҒАНИ,
«QH»