«Адал азамат» бағдарламасы: Қарағанды мектептерінде тәрбиеге жаңа серпін
2025 жылғы 1 қыркүйектен бастап еліміздің барлық білім беру ұйымдарында, соның ішінде жекеменшік мектептерде де «Адал азамат» атты бірыңғай тәрбие бағдарламасы іске қосылады. Бұл бастама бұрын жүзеге асырылған «Біртұтас тәрбие» тұжырымдамасының жалғасы болып, Мемлекет басшысының «Адал азамат – адал еңбек – адал табыс» идеологиялық қағидасымен үндестірілген. Бағдарламаның мақсаты – оқушыларға адалдық, еңбекқорлық, патриотизм және елжандылық қасиеттерін сіңіру, мектеп пен қоғам арасындағы байланысты нығайту.
«Адал азамат» бағдарламасының үйлестірушісі Ы. Алтынсарин атындағы Ұлттық білім академиясы мәліметіне сүйенсек, ҚР Оқу-ағарту министрлігінің 2025 жылғы 26 мамырдағы №123 бұйрығымен ресми түрде жаңа атауы бекітілген. Бағдарламаның негізгі ерекшелігі – барлық мектептерде бірыңғай визуалды стандартты енгізу. Мектептің ішкі және сыртқы келбеті ұлттық тәрбиелік құндылықтарды көрсететін ортаға айналады, ал ай сайын белгіленген тақырыптар сабақ пен сыныптан тыс іс-шараларды сабақтастырады. Мысалы, әділдік, еңбекқорлық, патриотизм сынды құндылықтар оқу процесінің өзегіне айналмақ.
– «Адал Азамат» бағдарламасы оқушылардың бойында отансүйгіштік сезімді, еңбекқорлықты және адамгершілік құндылықтарды қалыптастыруға бағытталған. Бағдарлама мектептерде бірыңғай тәрбиелік экожүйе құрудың ұйымдастырушылық негізіне айналады, – деді Ы. Алтынсарин атындағы Ұлттық білім академиясының вице-президенті Анар Тәңірбергенова. – Әрбір мектеп жыл сайын құндылықтарға негізделген оқу-тәрбие жоспарын әзірлейді. Онда мектептің көрнекі безендірілуінен бастап, негізгі құндылықтар тізімі мен оларды жеткізу тәсілдері айқындалады. Дәліздер мен сыныптар бірыңғай дизайн-кодпен рәсімделеді.
Қарағанды облысында жаңа оқу жылында бірқатар тың бастамалар қолға алынады. Ең бастысы – «Адал Азамат» бағдарламасын енгізу. Бұл қадам тәрбиелік жұмыстың тұтастығын қамтамасыз етіп, оның тиімділігін арттыруға ықпал етеді. Сонымен қатар, өңір мектептерінде ұлттық құндылықтар мен патриотизмді насихаттайтын «Ізгілікті азамат» бағдарламасы іске асуда, ал ата-аналармен өзара әрекеттестікті арттыруға арналған 16 жоба жүзеге асырылуда. Бұл туралы Қарағаныда өткен педагогтердің дәстүрлі тамыз конференциясында айтылды.
Келер оқу жылынан бастап өңірдегі барлық мектептер бірыңғай визуалды стильге көшеді. Бұл қадам тәрбиелік жұмыстың тұтастығын қамтамасыз етіп, оның тиімділігін арттыруға ықпал етеді.
Оқу орындарында педагогикалық қолдау орталықтары мен отбасылардың тәрбие саласындағы құзыреттілігін арттыруға арналған «Даналық мектебі» клубтары жұмыс істейді.
Мектептерде қауіпсіз әрі қолайлы орта қалыптастыруға ерекше көңіл бөлінуде. Жаңа оқу жылынан бастап буллингтің алдын алуға арналған «Дос болайық» бағдарламасы енгізіледі. Осы мақсатта мұғалімдер мен психологтар арнайы оқытудан өтіп, бағдарламаның әдістемесін тәжірибеде қолданатын болады. Бағдарламаның негізгі мақсаты – балалар арасындағы шиеленістерді азайту, сенімділік пен сыйластық атмосферасын қалыптастыру, сонымен қатар оқушылардың психологиялық және эмоционалдық дамуына жағдай жасау.
– Басты міндетіміз – әрбір балаға өз қабілетін ашуға, денсаулығын нығайтуға және құндылықтық бағдарын қалыптастыруға жағдай жасау. Тәрбиелік жұмыс білім беру жүйесінің барлық деңгейінде басым бағыт болып қала беруі тиіс, – деп түйіндеді Қарағанды облысының әкімі Ермағанбет Бөлекпаев.
Сонымен қатар, жаңа оқу жылында облыстың мектептері спорттық, шығармашылық және экологиялық жобаларды да жүзеге асырады. Мысалы, облыстық футбол қауымдастығымен бірлесіп 10 мектепте футбол сабағы енгізіледі, ал Қарағанды қаласындағы №12, №33 мектептер мен Абай атындағы гимназияда «Жасыл мектеп» жобасы іске қосылады. Бұл бастамалар оқушылардың жан-жақты дамуына, өмірлік тәжірибесін байытуға бағытталған.
«Адал азамат» бағдарламасы – еліміздің барлық мектептерінде біртұтас тәрбиелік орта қалыптастыруға бағытталған маңызды қадам. Оқушылардың бойында адалдық, еңбекқорлық және патриотизм сияқты құндылықтарды қалыптастыру арқылы бағдарлама қоғамға жауапты, болашағы жарқын азаматтарды тәрбиелеуді көздейді.
Құралай ЖҰМАҒАЛИҚЫЗЫ,
«QH»