Қарттарға құрмет мерекемен шектелмейді

Қарттар күні қарсаңында Қарағанды облысында аға буын өкілдеріне құрмет көрсетіп, әлеуметтік қолдау шараларын ұйымдастыруға ерекше көңіл бөлінуде. Биыл өңірде 49 мыңға жуық адамды көмектің түрлі түрлерімен қамту жоспарланған.

Осы мақсаттарға облыстық бюджеттен шамамен 975 миллион теңге қарастырылған. Қаржының басым бөлігі 75 жасқа толған және одан асқан азаматтарға біржолғы материалдық көмек көрсетуге бағытталмақ.

Атап айтқанда, 43 мыңнан астам тұрғынға 21 625 теңге көлемінде төлем беріледі. Бұл – аға буын өкілдеріне көрсетілетін әлеуметтік қолдаудың бір бөлігі.

Дегенмен Қарттар күні тек материалдық көмекпен шектелмейді. Мереке қарсаңында облыстың қалалары мен аудандарында қарттарға арнап түрлі мәдени және қоғамдық іс-шаралар ұйымдастырылады. Ардагерлерге дастарқан жайылып, сыйлықтар табыс етіліп, концерттік бағдарламалар мен қойылымдар ұсынылады.

Сонымен қатар бұқаралық серуендер өткізіліп, мерекелік түскі астар ұйымдастырылады. Бұл шаралар шамамен төрт мыңға жуық адамды қамтиды деп жоспарланып отыр.

Қарттар күні жыл сайын 1 қазанда аталып өтеді. Бұл күн – аға буын өкілдерінің қоғамдағы еңбегін бағалап, оларға құрмет көрсетуге және қамқорлық танытуға үндейтін маңызды дата.

Қарағанды облысында мерекеге орай ұйымдастырылып жатқан шаралар мен әлеуметтік төлемдер қарттарға қолдау көрсетудің маңызын айқындай түседі. Аға буынға құрмет көрсету – бір күндік мерекемен шектелмей, күнделікті өмірде жалғасын табатын ізгі дәстүр.

Қанағат ЖИЕНҚҰЛОВА,

«QH»