Таза Қазақстан: экология мәдениеті әр адамнан басталады
Қоршаған ортаны қорғау – бүгінгі қоғамның маңызды міндеттерінің бірі. Таза ауа, таза су мен көрікті қала келбеті әрбір тұрғынның экологиялық мәдениетіне тікелей байланысты. Сондықтан «Таза Қазақстан» республикалық бастамасы аясында еліміздің түкпір-түкпірінде өткізіліп жатқан экологиялық шаралардың маңызы ерекше.
Қарағанды қаласының Орталық саябағында өткен «Taza Aimaq» фестивалі осы бағыттағы жарқын жобалардың біріне айналды. Фестиваль тұрғындарға экологияны қорғаудың тек міндет қана емес, қызықты әрі пайдалы іс екенін көрсетті. Іс-шара Дүниежүзілік қоршаған ортаны қорғау күніне орай ұйымдастырылып, жүздеген қарағандылықтың басын қосты.
Фестиваль барысында саябақта интерактивті алаңдар жұмыс істеп, қолөнер шеберлерінің көрмелері ұйымдастырылды. Алайда шараның басты ерекшелігі тұрғындардың қалдықтарды қайта өңдеу үдерісіне тікелей қатысуы болды.
Қатысушылар пластик қақпақтарды арнайы жинау орындарына тапсырып, велошредердің педальдарын өздері тепті. Осылайша пластик қалдықтар ұсақталып, кейін пайдалы бұйымдарға айналдырылды. Нәтижесінде тұрғындар жүрек пішіндес брелоктар мен телефонға арналған тұғырлар сияқты кәдесыйларға ие болды.
Балалар мен ересектер үшін бұл ерекше тәжірибе болды. Өйткені олар күнделікті тұрмыста қоқыс ретінде қабылданатын заттардың қайта өңделіп, жаңа өнімге айналатынын өз көздерімен көрді. Мұндай тәжірибе экологиялық тәрбиенің ең тиімді тәсілдерінің бірі саналады.
Мамандардың айтуынша, қоршаған ортаны қорғау мәдениеті дәрістер мен ескертулер арқылы ғана емес, адамдарды нақты іске тарту арқылы қалыптасады. Әсіресе жас ұрпақ үшін мұндай тәжірибелік шаралардың тәрбиелік маңызы зор.
Фестивальді ұйымдастырушылардың негізгі мақсаты да – табиғатқа қамқорлық жасаудың әркімнің қолынан келетінін көрсету. Өйткені экология тек мемлекеттік бағдарламалар мен ауқымды жобалардан тұрмайды. Ол күнделікті өмірдегі қарапайым әрекеттерден басталады: қоқысты сұрыптау, пластикті қайта өңдеуге тапсыру, қоғамдық орындардың тазалығын сақтау және табиғатқа ұқыпты қарау.
Қарағанды облысы әкімдігі мен Жастар ресурстық орталығының қолдауымен өткен шара тұрғындардың экологиялық жауапкершілігін арттыруға бағытталды. Ұйымдастырушылар мұндай бастамалар қоғамда жаңа экологиялық мәдениетті қалыптастыруға ықпал ететініне сенімді.
Бүгінде «Таза Қазақстан» акциясы ел көлеміндегі маңызды қоғамдық қозғалысқа айналып отыр. Оның басты мақсаты – көшелерді немесе саябақтарды бір күнге тазалау ғана емес, әр адамның санасында тазалық пен жауапкершілік қағидаларын орнықтыру.
Шын мәнінде, қаланың тазалығы коммуналдық қызметтердің ғана міндеті емес. Ол – әр тұрғынның азаматтық ұстанымының көрсеткіші. Қоқысты арнайы орынға тастау, қоғамдық мүлікке ұқыпты қарау, табиғатты қорғауға үлес қосу сияқты қарапайым әрекеттер үлкен өзгерістерге бастайды.
«Taza Aimaq» фестивалі тағы бір маңызды шындықты көрсетті: таза қала құру үшін үлкен күштің қажеті жоқ. Ең бастысы – әр адам өзінен бастап, қоршаған ортаға жанашырлықпен қарауы керек. Сонда ғана «Таза Қазақстан» идеясы нақты нәтижеге айналып, келер ұрпаққа таза әрі жайлы орта қалдыруға мүмкіндік береді.
Бекасыл ЕРАСЫЛ,
«QH»