Қарағанды полициясы қауіпсіздікті күшейтіп, құқық бұзушылықтың алдын алуда
Қарағанды облысында қоғамдық тәртіп пен жол қауіпсіздігін қамтамасыз ету мақсатында ауқымды профилактикалық іс-шаралар жүргізіліп жатыр. Қызметке өңіраралық полиция күштері шықты: жергілікті құрамға Астана қаласы мен Ақмола облысының бөлімшелері қосылды.
Салтанатты саптық байқау кезінде департамент басшылығы жеке құрамның дайындығын тексеріп, алдағы міндеттерін жүктеді. Патрульдік полиция, учаскелік инспекторлар, арнайы бөлімше сарбаздары және Ұлттық ұлан әскери қызметшілері күшейтілген режимде жұмыс істейді. Полицияның қоғамдық көмекшілері де тәртіпті күзетуге тартылды.
– Бұл өзара іс-қимылдың, тәжірибе алмасудың және күш біріктірудің жарқын көрінісі. Азаматтардың құқықтары мен бостандықтарын қорғау – біздің басты міндетіміз, – деді Қарағанды облысы ПД бастығы Негмет Исмағұлов. – Қоғамдық тәртіпті сақтау, жол қауіпсіздігін қамтамасыз ету және қылмыстың алдын алу – күнделікті жұмысымыздың негізі.
Қазірдің өзінде алғашқы нәтижелер байқалып отыр: демалыс күндері ғана ондаған құқық бұзушылық анықталды, оның ішінде мас күйінде көлік басқарған жүргізушілер ұсталды. Мысалы, үш күн ішінде мас күйінде көлік басқарған 17 дерек тіркеліп, бұрын жүргізу құқығынан айырылған 4 жүргізуші қайтадан рөлге мас күйінде отырғызып көргені үшін жауапқа тартылды.
Полиция департаменті бастығының орынбасары Жасқайрат Қайыров бұл шаралардың басты мақсаты – жазалау емес, құқық бұзушылықтың алдын алу екенін атап өтті:
– Мас күйінде көлік басқару – ауыр құқық бұзушылық. Егер мұндай әрекеттер дер кезінде тоқтатылмаса, оның салдары қайғылы жол-көлік оқиғаларына әкелуі мүмкін, – деді ол.
Күнделікті патрульдеу барысында құқық бұзушылықтар дер кезінде анықталып, олардың салдары алдын алынады. Мысалы, Балқаш қаласында жалған нөмірлі Nissan көлігі тоқтатылып, қолдан жасалған пышақ тәркіленді; Volkswagen Passat жүргізушісі көлігіне заңсыз жарық құрылғыларын орнатқаны үшін жауапқа тартылды.
Қарағанды полициясы күшейтілген режимде қызметін жалғастырып, тұрғындардың қауіпсіздігін қамтамасыз ету, өмірі мен денсаулығын қорғау, сондай-ақ көмекке мұқтаж әрбір адамға қолдау көрсету бағытында жүйелі жұмыс жүргізуде.
Қарағанды облысы ПД баспасөз қызметінің ақпараты негізінде