Жылқы жылы – қозғалыс пен жаңғыру кезеңі
Шығыс күнтізбесі бойынша 2026 жыл – қызыл отты Жылқы жылы. Ол 2026 жылдың 17 ақпанында басталып, 2027 жылдың 5 ақпанына дейін жалғасады. Мамандар бұл жылды қуатты энергия, батыл әрекеттер, ішкі еркіндік пен күрт өзгерістер жылы ретінде сипаттайды.
Жылқы – шығыс жұлдызнамасындағы 12 жануардың жетіншісі. Ол – қозғалыс пен даму, тәуелсіздік пен табандылық символы. Ал от стихиясы (қытайша ян – от) бұл белгінің табиғатын одан сайын күшейтіп, оған жігер, құмарлық, тез шешім қабылдау мен шығармашылық серпін береді. Осы екі элементтің бірігуі 2026 жылды ерекше мазмұнды әрі эмоционалды етеді. Қытай астрологиясында Жылқы жылы әр 12 жыл сайын қайталанады. Бұған дейінгі қызыл отты Жылқы жылдары: 1930, 1942, 1954, 1966. 2026 жыл – осы циклдағы келесі қызыл отты Жылқы жылы. Алдағы Жылқы жылы 2038 жылы болады, бірақ ол басқа элементпен байланысады. Астрологтар мен психологтар 2026 жылды бастамалар мен өзгерістердің кезеңі деп бағалайды. Бұл уақыт жаңа жобаларға кірісу, кәсіби салада өзгерістер жасау, көшбасшылық қасиеттерді дамыту үшін қолайлы. Адамдар дербес шешімдер қабылдауға, жеке еркіндікке ұмтылуға, тәуекелге баруға бейім болады. Сонымен қатар Жылқы жылына сәйкес саяхаттар мен жаңа ортаға бейімделу оң әсер береді. Бірақ мамандар бұл жылдың эмоциялық тұрғыдан күрделі болатынын да ескертеді. Шабыт пен энергияның артуы күйзеліске бейімділікті күшейтеді. Сол себепті ішкі тепе-теңдікті сақтау, сезімге берілмеу және артық күш жұмсамау маңызды. Бұл жыл – оқу, біліктілікті арттыру, жаңа дағдылар мен тіл меңгеру үшін өте қолайлы уақыт.
– Мен үшін 2026 жыл жаңа бастамалар мен өзгерістер жылы болады деп ойлаймын. Жылқының символикасы – еркіндік пен қозғалыс, бұл мені жеке жобаларымда батыл қадам жасауға ынталандырады. Өзгерістерден қорықпай, ішкі тәртіп пен тұрақтылықты сақтауға тырысамын. Сонымен қатар бұл жыл саяхатқа шығу мен жаңа адамдармен танысу үшін де қолайлы деп есептеймін, – дейді астролог Жаңалық Боранқұлқызы.
Жалпы алғанда, 2026 жыл белсенділік, жаңғыру және еркіндік жылы ретінде есте қалады. Ол шешімді әрекет етуге итермелейді, бірақ табысқа жету үшін эмоцияны басқару мен ішкі тәртіпті сақтау маңызды. Сол себепті астрологтар мен психологтар жыл бойы өз мүмкіндіктерін тиімді пайдаланып, жаңашылдыққа батыл қадам жасауға шақырады.
Қанағат ЖИЕНҚҰЛОВА,
«QH»