Мейірім дәмханасы: ерекше жандарға жаңа мүмкіндік

Қарағандыда ерекше қажеттіліктері бар жастарға арналған инклюзивті арт-дәмхана ашылады. Бұл жоба психикалық және физикалық тұрғыдан ерекшелігі бар жасөспірімдердің қоғамға бейімделіп, кәсіби тәжірибе жинақтауына мүмкіндік береді. Дәмхананың алғашқы қонағы – облыс әкімі Ермағанбет Бөлекпаев болды.

Жаңа дәмхана Майқұдықтағы Магнитогорск көшесі, 2-үйде орналасқан «Бізбен бірге бол!» интеграциялық орталығының базасында ашылмақ. Мұнда нағыз дәмхана атмосферасы қалыптасады: хош иісті кофе, жаңа піскен тәттілер мен жылы көңіл. Ең бастысы, келушілерге қызмет көрсететіндер – ерекше жандар. Алғашқы кезеңде ауысыммен сегізге дейін жасөспірім жұмыс істейді. Олардың барлығы – денсаулығына байланысты тұрақты жұмыс табуы қиын, 16 жастан асқан жастар. Бұл бастаманы «ACET inclusive» қоғамдық бірлестігі Қарағанды қалалық әкімдігінің қолдауымен мемлекеттік әлеуметтік тапсырыс аясында жүзеге асыруда.

Ұйымдастырушылардың айтуынша, инклюзивті арт-дәмхана – ерекше жастардың өмірге араласуына арналған әлеуметтік көпір. «Біз көбіне әлеуметтік тұрғыдан қолдауды қажет ететін, оқуды тәмамдағанымен қоғамда өз орнын таппаған жастармен жұмыс істейміз. Сондықтан біз тек әлеуметтік олқылықтардың орнын толтырып қана қоймай, оларды кәсіби тұрғыда даярлаймыз. Бұл олардың қоғамдағы мәртебесін арттырып, өз-өзіне сенім ұялатады», – дейді орталық өкілдері.

Бұл жоба елімізде ерекше жандарды қолдауға бағытталған кең ауқымды саясаттың бір бөлігі. Мемлекет басшысы Қасым-Жомарт Тоқаевтың бастамасымен инклюзивті қоғам қалыптастыру мақсатында бірқатар реформалар жүзеге асырылып келеді. Әлеуметтік кодекс аясында ерекше қажеттіліктері бар азаматтарға мемлекеттік жәрдемақылар мен әлеуметтік төлемдер төленеді, оңалту және арнайы қызметтер көрсетіледі, кедергісіз орта қалыптастыру шаралары жүйелі түрде жүргізілуде.

Интеграциялық орталықта жасөспірімдер тек қызмет көрсету саласында ғана емес, басқа да бағыттар бойынша оқытылады. Мұнда компьютерлік сауаттылық курстары, бариста, аспаз, тігінші және қолөнер шебері мамандықтарына баулитын үйірмелер жұмыс істейді. Әр қатысушының оқу бағдарламасы оның жеке қабілетіне және ерекшелігіне қарай бейімделген. «Бізде үш негізгі бағыт бар: әлеуметтік-мәдени, әлеуметтік-шығармашылық және әлеуметтік-еңбек. Соңғысы қазіргі таңда ата-аналар мен қоғамдық ұйымдардың қолдауымен белсенді дамып келеді. Себебі ерекше балалардың басым бөлігі есейген соң үйде қалып қояды. Біздің мақсат – сол жастарды қоғам өміріне араластыру», – дейді «Бізбен бірге бол!» орталығының жетекшісі Әсел Бекбаева.

Орталықта креативті индустрия бағыты да дамытылуда. Мұнда инклюзивті театр жұмыс істейді, тәрбиеленушілерге фильмдер мен мәдени қойылымдар көрсетіледі. Бұл олардың шығармашылық қабілетін ашуға, өз ойын еркін жеткізуге және өмірге деген қызығушылығын арттыруға мүмкіндік береді.

Аймақ басшысы Ермағанбет Бөлекпаев жаңа арт-дәмхананың маңыздылығын атап өтіп, жобаны қоғамдағы инклюзивті ортаны дамытудың нақты мысалы деп бағалады. «Мұндай бастамалар ерекше жандардың өмір сапасын арттыруға, олардың әлеуетін ашуға ықпал етеді. Біз бұл бағыттағы жұмыстарды жалғастырып, жаңа әлеуметтік жобаларды жүзеге асыруды қолдаймыз», – деді облыс әкімі.

Жақын уақытта Қарағандыда тағы бір ерекше жоба – инклюзивті баспа орталығы ашылмақ. Бұл бастамалар ерекше жандарға өз орнын табуға, қоғам өміріне белсенді қатысуға және өз еңбегі арқылы қоғамның толыққанды мүшесі болуға жол ашады.

Қарағандыда ашылатын инклюзивті арт-дәмхана – бұл жай ғана әлеуметтік жоба емес, бұл – мейірім мен мүмкіндіктің тоғысқан нүктесі. Мұнда әрбір ерекше жас адам өз арманына бір қадам жақындайды, ал қоғам олардың еңбегі мен табандылығы арқылы шынайы адамгершіліктің мәнін түсінеді.

Құралай КӨБЕНОВА,

«QH»