Ғылым мен болашаққа арналған халықаралық форум

Орталық Қазақстан академиясында Бейбітшілік пен даму жолындағы ғылымның дүниежүзілік күніне арналған VI Халықаралық ғылыми форум өз мәресіне жетті. Биылғы жиын «Сенім, трансформация және болашақ: 2050 жылға қажет ғылым» тақырыбында өтті. Форум барысында отандық және шетелдік ғалымдар қазіргі ғылымның даму үрдістерін, оның қоғамдағы маңызын, сондай-ақ болашаққа сенім мен өзгерістердің рөлін жан-жақты талқылады. Шара ғылыми қауымдастық пен жастар үшін идея алмасудың маңызды алаңына айналды.

Орталық Қазақстан академиясында Бейбітшілік пен даму жолындағы ғылымның дүниежүзілік күніне орай VI Халықаралық ғылыми форум өтті. Биылғы шара «Сенім, трансформация және болашақ: 2050 жылға қажет ғылым» тақырыбымен ұйымдастырылды. Әдетке айналған бұл форумға Қазақстаннан, сондай-ақ Әзербайжан, Беларусь, Ресей және Өзбекстаннан ғалымдар, оқытушылар мен зерттеушілер қатысты. Барлығы шамамен 130 ғылыми жұмыс ұсынылды. Жұмыс авторлары құқықтану, экономика, әлеуметтік, гуманитарлық және жаратылыстану ғылымдарының өзекті бағыттарын талқылады. Қатысушыларға сәлемдесу сөзін Академияның оқу және ғылыми жұмыс жөніндегі проректоры Оксана Шахновская айтты. Ол қазіргі ғылымның тек прогрестің қозғалтқышы ғана емес, сонымен бірге қоғамдағы сенімділікті нығайту және бейбітшілікті сақтау құралы екенін атап өтті.

–Бүгінгі ғылым тек прогрестің қозғаушы күші ғана емес, сонымен қатар қоғамдағы сенім мен бейбітшілікті нығайтудың маңызды құралы. Мұндай форумдар ғалымдарды, зерттеушілерді, оқытушыларды біріктіріп, тәжірибе алмасуға, жаңа идеяларды талқылауға мүмкіндік береді. Барлық қатысушыларға ғылыми ізденістерінде табыс тілеймін. Бүгінгі талқылаулар – біздің ортақ болашаққа, сенімге және қоғамның дамуына үлес қосатын маңызды қадам. Ғылым қазіргі қоғам үшін тек білім көзі емес, сонымен бірге әлеуметтік тұрақтылықты қамтамасыз ететін құрал. Ғылымның арқасында адамдар арасында сенім қалыптасады, жаңа технологиялар мен шешімдер дамиды, – деді Орталық Қазақстан академиясының оқу және ғылыми жұмыс жөніндегі проректоры Оксана Шахновская.

Форум аясында жетекші ғалымдар мен академиялық қауымдастық өкілдерінің баяндамалары тыңдалды. Орталық Қазақстан академиясының доценті Иван Кучер ғылым саласындағы коммуникация мен елдер арасындағы білім алмасуда сенімнің маңыздылығын ерекше атап өтті.

– Ғылымның болашағы – адамның болашағы. Егер біз сенімділікті, шындыққа ұмтылысты сақтап, ойлауды тек ақылмен ғана емес, жүрекпен де жасау қабілетін сақтай алсақ, онда 2050 жылға қарай ғылым ақыл, бейбітшілік пен шығармашылық ғылымына айнала алады, – дейді Академия доценті Иван Кучер.

Дискуссияларға шетелдік қонақтар да белсенді қатысты. Өз тәжірибесімен Витебск қаласынан келген педагогика ғылымдарының кандидаты, доцент Елена Михайлова бөлісті. Ол педагогикалық зерттеулердің және заманауи ғылымның әлеуметтік бағыттылығының маңызды екенін айтып өтті.

– Бұл – ата-бабаларымыз бізге қалдырған мұра. Бұл педагогикалық мұра, тәрбиелік идеялар, ауыз әдебиеті мен халық шығармашылығы, тәрбие құралдары мен әдістері. Барлығы – өз елінің азаматтарын биік адамгершілікке тәрбиелеуге көмектескен құндылықтар, – деп атап өтті П. М. Машеров атындағы ВМУ-дің әлеуметтік-педагогикалық жұмыс кафедрасының меңгерушісі (Беларусь Республикасы) Елена Михайлова.

Сөз сөйлеген тағы бір қонақ – Мәскеу мемлекеттік құрылыс университетінің ұлттық зерттеу орталығының оқытушысы Альбина Макаева болды. Ол ғылым мен практиканың өзара әрекеттесуі тұрақты даму мен технологиялық прогрестің негізгі кілті екенін атап өтті.

– Жобалық қызмет қазіргі заманғы ұйымдардың мемлекеттік процестерінің ажырамас бөлігіне айналуда. Бүгінгі жоғары білім жүйесінде жобалық қызметтің жоғары нәтижелерге қол жеткізуі үшін тиімді жобаларды басқару жүйесі шын мәнінде қажет, – дейді Мәскеу мемлекеттік құрылыс университетінің ұлттық зерттеу орталығының оқытушысы Альбина Макаева.

Жыл өткен сайын форумға қатысушылар саны артып, тәжірибе мен идея алмасуға арналған маңызды халықаралық алаңға айналып келеді. Ұйымдастырушылар шараға қызығушылықтың өсіп жатқанын және қатысушылардың географиясының кеңейіп келе жатқанын атап өтті.

Қанағат ЖИЕНҚҰЛОВА,

«QH»