Жыраулық дәстүрді жалғаған байқау

Облыс көлемінде жыл сайын дәстүрлі түрде өтіп келе жатқан «Бұқарекең жырлайды» атты байқау осы жолы да жоғары деңгейде ұйымдастырылды. Бұл өнер жарысында өңірдің аудандары мен қалаларынан жүзге жуық үміткер жиналды. Жарыстың басты мақсаты – халқына есімі өшпес, терең әдеби мұрасымен дараланған жырау Бұқар жырау Қалқаманұлының шығармашылығын кеңінен насихаттау, жыраулық пен жыршылық дәстүрді жаңғыртып, жас ұрпаққа ұлттық рухты сіңіру.

Жарыс төрт аталым бойынша өтті. «Бұқар жырауша» аталымында қатысушылар жыраулық стильде жазылған авторлық туындыларын ұсынып, қоғамдағы маңызды мәселелерді өз жырларына арқау етті. «Бұқар жырау оқуларында» аталымында Бұқар жыраудың жыр‑толғауларын жатқа мәнерлеп оқығандар бақ сынады. «Жыршы‑жыраулар сайысында» әнші‑жыршылар Бұқар жыраудың шығармаларын белгілі бір музыкалық аспаппен орындады. Сонымен бірге «Әлемді түгел білсе де…» аталымы бойынша өзге ұлт өкілдері қазақша, орысша немесе өз тілдерінде Бұқар жыраудың жыр‑толғауларын мәнерлеп оқыды.

Қазылар алқасында өнер зерттеушісі әрі жыршы‑термеші Елдос Еміл төрағалық етті. Сонымен қатар әнші, Қазақстанның еңбек сіңірген қайраткері Сержан Мұсайын, ақын әрі Қазақстан Жазушылар одағының мүшесі Бағдат Мүбарак, филология ғылымдарының кандидаты Саржан Такиров пен айтыскер ақын Нұрмұхамед Байсүгіров болды. Байқаудың қорытындысы бойынша әр аталым бойынша жүлделі орындар мен арнайы сыйақылар табыс етілді.

– Жыл сайын қатысушылардың саны өсіп келеді. Бұқар жыраудың елуден астам жырын жаттаған оқушылар бар. Мұның өзі үмітіміздің ақталатынын көрсетеді. Ақпараттық ағыны жылдам, цифрлық дәуірде ұрпаққа осындай байқаулар арқылы ұлттық сананы дәнекерлеу, мәдени мұраны қорғау маңызды екені айқын, – деді сайыс ұйымдастырушысы Айтбай Жұмағұлов.

Осылайша, «Бұқарекең жырлайды» байқауы мәдениет пен өнер алаңында маңызды оқиғаға айналып, жастар арасына жыраулық дәстүрдің тамырын жеткізу, сөз сәнінің сұлулығын көрсету және ұлттық поэзияны жаңғырту бағытында тың қадам болып отыр.

Ералы ҒАНИ,

«QH»