Абай сөзі – болашаққа бағдар
Өңірімізде Абай Құнанбайұлының асыл сөзін іздеушілерге арналған республикалық әдеби сайыс өтті. Ұлағат оқырман клубы мен Oqyrman кітап дүкені ұйымдастырған бұл шара жастардың шығармашылық қабілетін шыңдап қана қоймай, Абай мұрасын терең танытуға бағытталған. Байқауға өңірдің әртүрлі жас санатынан қатысушылар келіп, классиктің өлеңдерін жатқа айтып, өз шығармаларын оқыды.
Бірінші кезеңде қатысушылар Абай өлеңдерін көркемсөз өнерімен жеткізіп, сөздің мәнін ашуға тырысты. Осы кезеңде академик Е.А.Бөкетов атындағы Қарағанды Ұлттық зерттеу университетінің студенті Абылай Дүйсен ерекше көзге түсіп, бас жүлдені жеңіп алды. Екінші бөлімде жас ақындар өз қаламынан туған шығармаларын оқып, Абайға арналған жаңа өлеңдерін ұсынды. Сонымен қатар, арнайы тақырып бойынша жедел шығармашылық тапсырмалары да берілді. Бұл бөлімде жас ақын Ералы Ғани үздік деп танылды. Үшінші кезеңде қатысушылар Абай, Шәкәрім және басқа да көрнекті ақындардың шығармаларын ән мен күйге келтіріп, орындады. Мұнда жас өнерпаз Қазыбек Рашид ерекше көзге түсті.
Байқаудың ұйымдастырушылары мен қазылар алқасы шараның жастар үшін маңызды екенін атап өтті.
– Абайдың мол мұрасын насихаттау баршамыздың ортақ борышымыз. Болашақ жастардың қолында. Ал сол жастар әдебиетке, өнерге жақын болып өсіп, руханиятымызды жаңғыртуымыз керек. Осындай шаралар жалғасын табатын болады, – деді «Qasymkitap» баспасының редакторы Гүлдана Қуатқызы.
Қазылар құрамында облыстық тілдерді дамыту жөніндегі басқармасы Ресурстық тіл орталығының бөлім меңгерушісі Жұпар Жақан, Қ.Байжанов атындағы концерттік бірлестік әншісі Сырым Хордин және академик Е.А.Бөкетов атындағы Қарағанды Ұлттық зерттеу университетінің «Студенттер үйінің» директоры Бектас Жұман болды. Байқау соңында барлық жеңімпаз бен қатысушыларға алғысхаттар мен естелік сыйлықтар табыс етілді.
Бұл шара жастарға Абай шығармашылығын терең түсінуге мүмкіндік беріп, көркем сөздің күшін сезіндірді. Өлең арқылы, жазба және музыкалық орындау арқылы жас буын Абай философиясын ізгілік, адамгершілік, парыз, сөз мәдениетін бойына сіңіреді. Абайдың асыл сөзін оқып, зерттеу арқылы жастар өз ой-санасын дамытып, болашағына қажетті рухани азық алады.
Ералы ҒАНИ,
«QH»