Қарағандыда жаңа бастамалар талқыланды
Қағазбастылықтан арылып, нақты нәтижеге бағытталған жұмыс форматына көшу – мемлекеттік қызметтің басты басымдықтарының бірі. Осы бағытта Мемлекеттік қызмет істері агенттігі еліміздегі мемлекеттік органдарға бюрократиялық кедергілерді жоюға белсенді түрде қолдау көрсетуде. Қарағанды облысының мәдениет, мұрағат және құжаттама басқармасы мамандары дөңгелек үстел басына жиналып, алдағы өзгерістерді талқылап, тиімді іс-қимылдың жолдарын бірлесе қарастырды.
Мемлекеттік басқару жүйесін жетілдіру мақсатында 2022 жылдан бері Мемлекеттік қызмет істері агенттігі бюрократиялық кедергілерді азайтуға бағытталған кешенді талдау жұмыстарын жүргізіп келеді. Бұл бастама мемлекеттік қызметтің жеделдігі мен тиімділігін арттыруды көздейді.
– Әлеуметтік-экономикалық саладағы түрлі бағыт кезең-кезеңімен талдануда. Бүгінгі күн тәртібінде жаңадан құрылған жұмыс тобының отырысы өтеді. Бұл жолы талқылау нысаны – Мәдениет және ақпарат министрлігінің қызметі. Атап айтқанда, тарихи-мәдени мұраны сақтау және пайдалану, электронды құжат айналымы, архив ісі, ономастика және креативті индустрия салаларына қатысты мәселелер қарастырылатын болады, – деді ҚР Мемлекеттік қызмет істері агенттігінің Қарағанды облысы бойынша департаментінің басшысы Жандос Сәрсен.
Алдағы өзгерістердің басты назарында – басқарушылық үдерістерді бюрократиядан арылту және мемлекеттік органдар жұмысының ашықтығын қамтамасыз ету тұр. Сонымен қатар, артық жүктемелер мен қайталанатын функцияларды қысқарту арқылы мемлекеттік қызметті оңтайландыру мәселелері күн тәртібіне шығарылып отыр.
– Қолөнершілердің өзекті мәселелері әлі де бар. Олардың жұмыс сапасын арттыру – басты міндеттердің бірі. Бұл ретте қолөнер бұйымдарының сапасын растайтын арнайы сертификаттарды заңнамалық негізде енгізу қажет. Біздің орталық осындай қолдауды ұсынуға дайын. Алайда бұл механизмнің тиімділігі мен сұранысы нарықта нақты көрініс табады. Сол себепті біз бұл бастаманы жүйелі түрде енгізуді жоспарлап отырмыз, өйткені бұл – қазіргі нарықтың талабы, – дейді «Сарыжайлау» кинотеатры басшысының міндетін атқарушы Арман Әлімжанов.
Кездесу нәтижесінде алдағы кезеңге арналған нақты жұмыс жоспары бекітілді. Енді қыркүйек айына дейін мамандар өзекті де шешімін таппаған мәселелерді талдап, оларды шешудің тиімді жолдарын ұсынуы қажет.
Қанағат ЖИЕНҚҰЛОВА,
«QH»