Қоғамдық көлік бағасы тағы да талқыда

Қарағандыда қоғамдық көлікте жол жүру тарифін 120 теңгеге дейін көтеру мәселесі қаралды. Бұл өзекті тақырып қалалық мәслихат жанындағы тұрақты комиссияның бірлескен отырысында талқыланды. Жиын барысында жолаушылар тасымалын субсидиялау тетіктері де назарға алынды. Қоғамдық көлік қызметінің сапасы мен шығындарын өтеу – негізгі талқыға түскен мәселелердің бірі болды.

Бүгінде Қарағанды қаласында жолаушыларға қызмет көрсететін 7 тасымалдаушы бар, олардың күн сайын желіге шығаратын автобустарының саны – 460 дана. Биыл 70 жаңа автобус сатып алынып, көлік паркі жаңартылды. Сонымен бірге, жүргізушілердің жалақысы 10%-ға көтерілді, ал жанармай бағасының өсуі тасымалдаушылардың шығындарын айтарлықтай еселеп арттырды. Қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы депутаттарға тарифтің көтерілуі экономикалық тұрғыдан негізді екенін түсіндіріп берді.

– Бүгінгі таңда автобустардың тұрақты және сенімді қызмет көрсетуі қамтамасыз етіліп, автопарктің 85%-ы жаңартылды. Жүргізушілер штаты 700 адамға дейін ұлғайтылып, олардың орташа жалақысы 600 мың теңгеге дейін арттырылды. Қаланың барлық аудандары мен секторлары маршруттық желі арқылы қамтылып, тұрғындарға ыңғайлы және қолжетімді көлік қызметі көрсетілуде, – деді Қарағанды қалалық  ТКШ, жолаушылар көлігі және автомобиль жолдары бөлімінің басшысы Ержан Кокушев.

Мұндай қосымша қаржыландыру жол қозғалысының тиімділігін арттырып, кешкі уақытта қоғамдық көліктің жүрісін көбейтуге мүмкіндік береді. Бұл қаржы жаңа автобустарды сатып алуға, маршруттар желісін кеңейтіп, оларды желдеткіштермен қамтамасыз етуге жағдай жасайды. Қарағанды қалалық мәслихат депутаттары «ONAY!» төлем жүйесінің жұмысын және жол ақысын бақылау мәселелерін ерекше назарға алды.

– Билетсіз жүріп өтетін жолаушылар мәселесі өзекті болып отыр. Бұл тасымалдаушылардың табысына тікелей әсер етіп, тарифті көтеру қажеттігін дәлелдеуге себеп болады. Алайда, ең тиімді шешім – бағаны барлық жолаушыға бірдей көтерудің орнына, билетсіз жүру жағдайларын бақылауды күшейту, – дейді Қарағанды қалалық мәслихатының депутаты Бахтияр Омарханов.

Тұрақты комиссия отырысында мәселе толық шешімін таппады. Жол жүру ақысының тарифі жан-жақты талқыланып, барлық маңызды аспекті ескерілгеннен кейін ғана бекітілетіні айтылды.

Қанағат ЖИЕНҚҰЛОВА,

«QH»