Қарағанды облысында қылмыс азайды
Қарағанды облысында қылмыстық оқиғалар саны 7,8 пайызға азайған. «Бұл – жыл басында қолға алынған «Заң мен тәртіп» жобасының нақты нәтижесі» дейді мамандар. Қазір бұл бастама сәтті жалғасып жатыр. Жоба аясында тәртіп сақшылары «Таир» сауда үйінде ақпараттық-түсіндіру жұмыстарын жүргізіп, тұрғындардың көкейіндегі сұрақтарға жауап берді.
Шараның басты мақсаты – тұрғындардың құқықтық сауаттылығын арттыру. Шара барысында азаматтар нашақорлықтың алдын алу, алаяқтық әрекеттерден сақтану, сондай-ақ тұрмыстық зорлық-зомбылықтың алдын алу сынды өзекті мәселелер бойынша маңызды ақпарат алды.
– Азаматтарға нашақорлықтың зияны, алаяқтардан қалай сақтану керектігі, тұрмыстық зорлық-зомбылықтың алдын алу сияқты тақырыптар бойынша нақты түсіндіру жұмыстары жүргізілді. Бұл мәселелер қазіргі таңда өте өзекті болып отыр. Әсіресе, интернет-алаяқтық, отбасы ішіндегі құқықбұзушылықтар және жастар арасындағы есірткіге байланысты қылмыстар алаңдатып отыр. Сондықтан да біз бұл бағыттағы жұмыстарды жүйелі түрде жалғастырамыз, – деді Қарағанды облыстық ПД бастығының орынбасары Жасқайрат Қайыров.
Облыста алаяқтыққа қарсы жүйелі және қарқынды жұмыс жүргізіліп келеді. Осы күш-жігердің нәтижесінде тұрғындардың алаяқтарға алдану жағдайы 30 пайызға төмендеді, бұл құқық қорғау органдарының тиімділігінің айқын көрінісі болып отыр.
– Полиция өкілдері мен қоғамдық белсенділер бірлесіп, халықтың құқықтық мәдениетін арттыру мақсатында ауқымды шара ұйымдастырдық. Шараға тек қала тұрғындары ғана емес, сонымен қатар қала қонақтары да қатысты. Оларға маңызды әрі пайдалы ақпараттар беріліп жатыр. Жалпы айтарым, өз құқығын білетін адам ешқашан алаяқтардың құрбаны болмайды, – дейді Қарағанды қаласы ПБ жанындағы КӘЖ төрайымы Ирина Назырова.
«Заң мен тәртіп» қағидаты аясында биылғы жылдың басынан бері 1 000-ға жуық ақпараттық-түсіндірме жұмыстары жүзеге асырылды. Мамандардың айтуынша, бұл маңызды шаралар алдағы уақытта да өз жалғасын тауып, қоғамдағы құқықтық мәдениетті нығайтуға бағытталмақ.
Қанағат ЖИЕНҚҰЛОВА,
«QH»