Қарағанды мен Чехия: Индустрия, тарих және болашақ ынтымақтастық
Қарағанды облысына Чех Республикасы Парламенті Мәжілісінің вице-спикері Ян Бартошек бастаған делегация ресми сапармен келіп, өңір басшысы Ермағанбет Бөлекпаевпен кездесті. Тараптар экономиканың бірқатар салаларындағы ынтымақтастықты тереңдету мәселелерін талқылап, екіжақты байланысты жаңа деңгейге көтеруге ниетті екенін білдірді.
Кездесуде Ермағанбет Бөлекпаев Қарағандының еліміздегі жетекші индустриялық аймақтардың бірі екенін атап өтті. Облыстың өнімдері бүгінде әлемнің 50-ден астам еліне экспортталады. Алайда Чехиямен арадағы сауда көлемі әлі де төмен деңгейде.
«Біз Қазақстан мен Чехия Республикасы арасындағы екіжақты ынтымақтастықты нығайтуға бағытталған диалог пен дамуға деген ұмтылысты жоғары бағалаймыз», – деді аймақ басшысы.
Оның айтуынша, өңірде шетелдік капитал үшін тартымды алаңдар бар. Атап айтқанда, «Сарыарқа» арнайы экономикалық аймағы мен «Саран» индустриялық аймағында қазірдің өзінде халықаралық компаниялар жұмыс істеуде.
«Біздің қарым-қатынасты, сауда және өнеркәсіптік байланыстарды дамытуға барлық мүмкіндік пен ұмтылыс бар. Біз дайынбыз әрі бұл бағытта тәжірибеміз де бар», – деді Ермағанбет Бөлекпаев.
Сондай-ақ, облыстың Азия мен Еуропа арасындағы геостратегиялық орналасуы көлік және логистика салаларындағы әріптестікке кең жол ашады.
Чех делегациясының басшысы Ян Бартошек те өзара ынтымақтастықты дамытуға мүдделі екенін жеткізді. Оның айтуынша, екі ел арасындағы тауар айналымы өсіп келеді, алайда Қарағанды облысының бұл процестегі үлесі әлі де мардымсыз.
«Қарағанды облысымен де өзара сауда-саттықты дамытуға барлық мүмкіндік бар деп сенемін», – деді вице-спикер.
Сондай-ақ, ол білім беру саласындағы ынтымақтастықты атап өтті. Қазіргі таңда үш мыңнан астам қазақстандық студент Чехияда білім алуда. Бұл өзара байланыс болашақта да жалғасады деген сенім бар.
Сапар аясында чех делегациясы тарихи әділеттілікті қалпына келтіру бағытындағы жұмыстарға да назар аударды. Атап айтқанда, Бірінші дүниежүзілік соғыс кезінде Қарағанды өңірінде тұтқында болған чех азаматтарының тағдырын зерттеу – чех тарапына маңызды тақырыптардың бірі.
Бұл бағытта Қазақстанмен бірлескен іздестіру жұмыстарын жүргізуге дайын екенін жеткізген делегация, тарихи жадыны сақтау ісінде де ортақ күш біріктіруге мүдделі екенін білдірді.
Кездесу соңында Ермағанбет Бөлекпаев Қарағанды облысының халықаралық серіктестікке ашық екенін атап өтті. Оның айтуынша, өңір билігі экономикалық әріптестікпен қатар, тарихи мұраны сақтау мен оны зерттеу жұмыстарына да жан-жақты қолдау көрсетуге әзір.
Нәтижесінде, бұл сапар Қарағанды мен Чехия арасындағы әріптестіктің жаңа парағын ашуы мүмкін. Өңір үшін де, чех тарапы үшін де тиімді бағыттар айқындалып, нақты іс-қимылдарға жол ашылды.
Құралай КӨБЕНОВА,
«QH»