Металлургтер күні – еңбекке тағзым мен жаңа кеңістіктер уақыты
Теміртауда металлургтер күні қарсаңында Qarmet Park саябағы жаңартылып, металлургтер мен қала тұрғындарына арналған заманауи демалыс кеңістігі ашылды. Мереке күні өңірде кең көлемде аталып өтіп, облыс әкімі Ермағанбет Бөлекпаев теміртаулықтарды кәсіби мерекемен құттықтады.
Қарағанды облысының әкімі Ермағанбет Бөлекпаев Теміртауға арнайы келіп, жаңартылған Qarmet Park саябағындағы абаттандыру жұмыстарымен танысты. Бұл жоба – металлургиялық комбинаттың жеке инвестиция есебінен жүзеге асып жатқан қала тұрғындарына арналған сыйы.
– Теміртаулықтардың өмірі металлургиямен тығыз байланысты. Бұл саябақ – тек демалыс орны емес, металлургтер еңбегіне арналған рухани кеңістік. Әр тұрғын өзін осы жерден таба алады, – дейді жоба авторларының бірі.
Саябақтағы басты жаңалық – Даңқ аллеясы. Бұл – металлургиялық комбинат жұмысшыларының жыл сайынғы жетістіктерін бейнелейтін символикалық кеңістік.
– Бұл Лос-Анджелестегі Жұлдыздар аллеясы сияқты символ. Жыл сайынғы көрсеткіштер – көмір, темір рудасы, болат өндірісі – осы жерге жазылып отырады. Бұл – жаңа дәстүрге айналмақ, – деп түсіндірді авторлар.
Жаңа кеңістікте Street WorkOut, ашық жаттығу құрылғылары, волейбол мен баскетбол алаңдары, үстел теннисі аймағы, балалар ойын кешендері және серуен жолдары пайда болды. Кешен толық жарықтандырылып, қауіпсіздік пен жайлылық ескерілген.
«Қармет логотипі бейнеленген бұл кеңістік – бір жағынан символ, екінші жағынан – жұртшылыққа арналған сапалы демалыс орны. Мұнда әр жастағы адам өзіне лайық орын таба алады», – деп атап өтті идея авторы.
Дәл осы күні Отбасы демалысы мен балаларды дамыту орталығы ашылды. Жалпы ауданы 2700 шаршы метр болатын ғимаратта ниндзя-парк, скалодром, арқан жолдары, сырғанақтар, суперспуск және балаларға арналған өзге де нысандар бар. Орталық бір мезетте 290 адамды қабылдай алады. Мұнда фудкорт пен саябаққа панорамалық көрініс ұсынатын мейрамхана жұмыс істейді. 80 жаңа жұмыс орны құрылды.
Сонымен қатар бұл күні Металлургтер күні мерекесіне орай Теміртау мен Балқашта ауқымды іс-шаралар өтті. Теміртаудағы орталық алаңда өткен концертке 10 мыңға жуық адам жиналды. Мерекелік бағдарламаға Ресейдің халық әртісі Леонид Агутин, RaiM, Dequine, V $ X V PRiNCE сынды танымал әншілер қатысты. Qarmet компаниясы металлургтердің Құрмет тақтасын жаңартты, ал Temirtau Run атты бұқаралық жүгіру шарасына жүздеген адам қатысып, еңбек мерекесін ерекше рухта атап өтті.
Балқаш қаласында да Kazakhmys Smelting қолдауымен концерт ұйымдастырылып, өнер жұлдыздары өнер көрсетті. Балалар мен отбасыларға арналған арнайы бағдарламалар «Жастар» саябағында өтті.
– Құрметті теміртаулықтар! Металлург – бұл жай ғана мамандық емес. Бұл – қаланың жүрегі. Металлургтер – өндірістің үздіксіз қозғалтқышы. Сондықтан бүгінгі мерекеде сіздерді шын жүректен құттықтаймын! Қазір жұмыс орнында еңбек етіп жатқан азаматтарға да, осы алаңда жиналған барша тұрғынға да алғыс айтамын. Металлургтер күні құтты болсын! – деді Ермағанбет Бөлекпаев өз құттықтауында.
Металлургтер күні – бұл тек кәсіби мереке емес. Бұл — отбасылық байланыс, еңбекке деген тағзым және ұрпақтар сабақтастығының символына айналған ерекше күн. Теміртау мен Балқаштағы ауқымды іс-шаралар осыны тағы бір мәрте дәлелдеді.
Құралай ЖҰМАҒАЛИҚЫЗЫ,
«QH»