Бала санасын жаулаған Лабубу

Қазіргі таңда балалар арасында түрлі мульткейіпкерге еліктеу, ерекше бейнедегі ойыншықтарға қызығу белең алып келеді. Соның бірі соңғы айларда әлеуметтік желілерде кең таралып, TikTok пен Instagram-ды жаулаған «Лабубу» ойыншығы. Құлағы қалқиған, тістері ақсиған бұл мақұлық бейнесіндегі ойыншық алғашқыда сүйкімді көрінгенімен, ата-аналардың алаңдаушылығын тудыруда.

Балалардың да, ересектердің де қолынан түспей жүрген Лабубу әлеуметтік желілерде түрлі челлендж бен бейнероликтердің басты кейіпкеріне айналды. Әлемдік трендке енген бұл ойыншықтың шығу тарихы да қызық: авторы – қытайлық суретші Казник Лунк. Ол Лабубуды балаларға арналған мульткейіпкер ретінде емес, коллекциялық дизайнерлік өнім ретінде жасап шығарған. Алайда бірнеше ай бұрын танымал шетелдік блогерлер мен әншілер бұл ойыншықпен суретке түсе бастағаннан кейін, ол әлем бойынша сұранысқа ие болды.

Дегенмен, мамандардың айтуынша, мұндай бейнедегі ойыншықтар балалар психологиясына кері әсер етуі мүмкін.

– Лабубу мақұлық бейнесіндегі ойыншық болғандықтан, кішкентай балаларға жағымсыз әсер қалдыруы ықтимал. 3-10 жас аралығындағы балалар ненің қиял, ненің шындық екенін ажырата алмайды. Алғашында қызық көрініп, қуаныш сыйлағанымен, жалғыз қалғанда қорқып, ұйқысыздыққа немесе агрессияға бейімделіп қалуы мүмкін. Бұған дейін де осындай ойыншықтардан кейін ата-аналар балаларындағы мазасыздық пен қорқыныш жайлы жиі шағымданған. Лабубу да сол үрдісті қайталап жатқандай, – дейді психолог Перизат Әбдірахман.

Қарапайым ойыншық болып көрінгенімен, Лабубудың әсері жайлы пікірлер екіге бөлінген. Бірі оны сәнді тренд деп қабылдаса, енді бірі балалардың психологиялық саулығына қауіп төндіруі мүмкін екенін алға тартады.

Психологтар ата-аналарға балаларына ойыншық таңдауда аса мұқият болуды ұсынады. Өйткені бала психикасы әсерленгіш келеді, ал ойыншық тек ермек емес, оның тұлғалық дамуына ықпал ететін маңызды құрал.

Ералы ҒАНИ,

«QH»