Қарағанды зообағына солтүстіктің алыптары жеткізілді

Қарағанды хайуанаттар бағы жаңа әрі ерекше жануарлармен толықты. Қалың жүнді, ірі денелі, сонымен бірге өте шыдамды бұл жануарлар келушілердің қызығушылығын тудырып отыр.

Қарағанды хайуанаттар бағына 2024 жылы туған үш бірдей канадалық бизон жеткізілді. Зообақ қызметкерлері жануарлар жаңа ортаға тез үйреніп жатқанын айтады. Ал келушілер жаңа жануарларды қуана қабылдауда.

– Хайуанаттар бағына келмегенімізге көп болып еді. Бүгін келіп ерекше көңіл күйде болып жатырмыз. Бұрынғыға қарағанда аумағы үлкейіп, көптеген жаңа аң әкеліпті. Ең бастысы балаларым риза, – дейді қала тұрғыны Кәмилә Рысқұлбекова.

Бизондар – Жер шарындағы ең көне аңдардың бірі. Мұз дәуірінен аман қалған бұл ірі жануарлардың салмағы 900 келіге дейін жетеді. Сағатына 50 шақырым жылдамдықпен жүгіреді, өзеннен де жүзіп өте алады. Қалың жүнін көктемде түсіріп, жазға қарай жеңілдейді.

– Биыл сәуір-мамыр айларында бизондарды Ақмола облысынан алып келдік. Бұлар негізінен канадалық бизондар деп аталады. Басты мақсатымыз – жануарлар түрін көбейтіп, тұқымын алу. Біздің табиғатымызға тез бейімделіп кетті. Тәбеттері жақсы үш мезгіл тамақтандырамыз. Жануарлар жақсы жетіліп, өсуі үшін түрлі витамин, көкөністер, жеміс-жидектер және жем шөбін беріп отырамыз, – дейді Қарағанды хайуанаттар бағының тұяқты жануарлар бөлімінің меңгерушісі Ербол Ғабдулин.

Қызметкерлердің айтуынша, Марс – топтағы көшбасшы рөлінде. Ал Венера мен Майя жаңа мекенді қызығушылықпен зерттеуде. Хайуанаттар бағы келушілер санын арттыру үшін осындай ерекше аңдарды әкелуді жалғастырмақ.

Қарағанды хайуанаттар бағы табиғатты сүйетін жандар үшін таптырмас орынға айналып келеді. Ал канадалық бизондар – бұл бағыттағы тағы бір ерекше қадам.

Ералы ҒАНИ,

«QH»