Суретші Мәдихан Қалмахановтың жеке көрмесі

Облыстық бейнелеу өнері музейінде қарағандылық суретші Мәдихан Қалмахановтың есептік жеке көрмесі өтеді. Көрменің ашылуы 7 қараша сағат 16:00 жоспарланған. «Ізденістер, жолдар, шешімдер» деп аталатын экспозициясы автордың 50 жылдығына орай өткізіледі.

Мәдихан Қалмаханов Қазақ Мемлекеттік өнер академиясының түлегі. Қазір ҚР Суретшілер Одағының мүшесі, ҚР Өнер академиясының корреспондент-мүшесі, Е.А. Бөкетов атындағы Қарағанды зерттеу университетінің аға оқытушысы, педагогика ғылымдарының магистрі, көптеген шетелдік, республикалық, облыстық көрмелер мен симпозиумдардың қатысушысы.

«Суретшінің шығармаларынан Отанға деген сүйіспеншілікті және қазақ халқының мәдени салт-дәстүрін көруге болады. Пейзаждар, портреттер, сюжеттік картиналар классикалық кескіндеме түрінде жасалған. Көрме 24 қарашаға дейін жалғасады», – деп атап өтті музейде.

Айта кетейік, Мәдихан Қалмахановтың шығармалары Қазақстан, Ресей, ТМД елдері, Германия, Франция, Кипр, АҚШ және Израиль музейлерінде және жеке коллекцияларда сақталған.

Құралай ӘЛЖАППАР,

 «QH»