Балалар – ұлт болашағы

Ықылым заманнан бері қай елде болмасын «Балалар – ұлт болашағы» деген берік қалыптасқан қағида бар. Сондықтан балаларға мемлекеттің қамқорлығы, жан-жақты жағдай жасауы өте маңызды. Президентіміз Қасым-Жомарт Тоқаевтың «Ұлттық қор – балаларға» атты жаңа бағдарламасын бұқара халық зор үміт артып, қуана қабылдағаны да сондықтан.

Бұл бағдарлама – ел болашағына салынып отырған стратегиялық инвестиция. Президент ел көңілінен шыққан тың бағдарлама туралы 2022 жылдың 1 қыркүйегінде жариялаған «Әділетті мемлекет. Біртұтас ұлт. Берекелі қоғам» атты Жолдауында айтты.

«Біз Ата Заңымызда «Жер мен табиғи ресурстар – халықтың меншігі» деген басты қағидатты бекіттік. Бұл – құр сөз емес. Бұл – барлық реформаның арқауы. Әрбір отбасы еліміз пайдаланып жатқан ұлттық байлықтың игілігін көруі керек. Сондықтан мен жариялаған Балалар жылының аясында «Ұлттық қор – балаларға» атты мүлде жаңа бағдарламаны жүзеге асыру өте маңызды деп санаймын. Ұлттық қордың жыл сайынғы инвестициялық табысының 50 пайызын балалардың арнаулы жинақтаушы есепшотына аударуды ұсынамын. Қаржы әр бала 18 жасқа толғанға дейін аударылып тұрады, оны мерзімінен бұрын есепшоттан шығарып алуға болмайды. Жинақталған қаржы, балалар кәмелет жасына толғаннан кейін, олардың баспана немесе білім алуына жұмсалады. Бұл қаражат өскелең ұрпақтың үлкен өмірге қадам басуына мүмкіндік береді. Қор, шын мәнінде, ұлттық мәртебеге ие болып, халқымыздың игілігіне қызмет етеді. Бастаманы мұқият әзірлеу қажеттігін ескере отырып, жобаны 2024 жылғы 1 қаңтардан бастап іске қосуды тапсырамын», – деді Қасым-Жомарт Тоқаев.

Мемлекет басшысының бұл бастамасы – жарқын болашаққа деген үлкен сенім. Еліміздің табиғи байлықтарын сатудан түсетін табысты халық игілігіне жұмсауға арналған бағдарламадан үлкен үміт күтеміз!

Нұрлыхан ҚАЛҚАМАНҰЛЫ,

«QH»