Жұмыспен қамтуда бизнестің үлесі жоғары

Қарағанды облысында шағын және орта бизнес жұмыспен қамтылған халықтың 42%-ын жұмыспен қамтамасыз етіп отыр. Аймақ экономикасында бұл сектордың рөлі үнемі өсіп келеді. Дегенмен шешуді қажет ететін мәселелер бар.

Кәсіпкерлер өңір басшысы Жеңіс Қасымбекпен және «Атамекен» ҰКП төралқа төрағасы Райымбек Баталовпен кездесуде бизнестің дамуына не кедергі болып отырғанын ашық айтты.

– Қарағанды облысында бизнес өте белсенді. Біз бизнес-қоғамдастықпен тоқсан сайынғы кездесу өткіземіз. Мақсат – жүйелі мәселелер спектрін анықтау. Біз үшін тек талқылау ғана емес, олардың шешімін табу маңызды. Жергілікті атқарушы билікпен тығыз ынтымақтастықта жұмыс істейміз. Бұл – кәсіпкерлік үшін қолайлы ахуал туғызуға қажет, – деп атап өтті Райымбек Баталов.

Бүгінде облыста 90 мыңға жуық кәсіпкерлік субъектісі бар.

– Өңір әлеуметтік-экономикалық дамудың оң серпінін сақтап отыр. Бұл ретте шағын және орта бизнестің рөлі маңызды. Бұл сектордағы өндіріс көлемі 2 трлн теңгеден асты. Аталмыш көрсеткішті «Қазақмыс» корпорациясы мен «АрселорМиттал Теміртау» компаниясының көлемімен салыстыруға болады. ШОБ 202 мыңға жуық адамды жұмыспен қамтамасыз етеді, бұл – облыстағы жұмыспен қамтылған халықтың 42%-ы, – деді Жеңіс Қасымбек.

Кездесу еркін микрофон форматында өтті. Кәсіпкерлер бизнесті қорғау, салық салу, логистика және инфрақұрылым мәселелерін көтерді. Мысалы, кәсіпкерлер мәмілелерді жарамсыз деп тану тәжірибесін толығымен қайта қарауды сұрайды. Олар сондай-ақ көлеңкелі мектепке дейінгі ұйымдардың қызметіне алаңдайды.

Кей сұраққа диалог барысында бірден жауап берілді. Бірқатар адам мүдделі органдардың қатысуымен қосымша кездесу ұйымдастыруға келісті.

Облыс әкімі әрбір өтініш бойынша мұқият талдау жүргізуді тапсырды. Кездесуде мемлекеттің көмегіне тек ашық жұмыс істейтіндер ғана сене алатыны арнайы аталып өтті.